Teknologia Garbien Euskal Zerrenda
Teknologia Garbien Euskal Zerrenda (ETGZ), Ihobek, EEEk eta SPRIk sustatua, garapen iraunkorra bultzatzeko eta euskal ingurumen-politikaren aplikazioa errazteko tresna fiskala da, transferentzia teknologikoaren eta ingurumen-jarduera hobea duten ekipoen ezarpenaren bidez.
“Teknologia garbia” da ingurumen-inpaktu negatiboak murrizten dituen prozesu, produktu edo zerbitzu oro, energia eraginkortasunean eta ingurumena babesteko baliabideen edo jardueren erabilera jasangarrian hobekuntza nabarmenak eginda.
Teknologia Garbiak aplikatzeak abantaila osagarriak ditu, adibidez:
- fabrikazio-prozesuak modernizatzen dituzte, produktibitate, kalitate eta segurtasun handiagoa sortuta.
- eraginkortasuna handitzen dute; fabrikazio-kostu unitarioak murriztu eta industrien lehiakortasuna hobetzen dute.
- lotutako jarduera ekonomikoa sortzen dute, eta zerbitzuen sektore osagarriak gaitzen ditu, hala nola ingeniaritzak, instalatzaileak, aholkularitza eta abar, horiek ezartzeko eta erabiltzeko.
- industria-jardueraren balio erantsia handitzen dute; beste eskualde batzuen aldean lehiakortasun globala errazten dute.
Edozein teknologia eskuratuz gero, ekipoaren inbertsio-kostuaren % 30eko kenkaria lor daiteke sozietateen gaineko zergaren kuotaren gainean.
Egoitza fiskala Euskal Autonomia Erkidegoan duten enpresek Sozietateen gaineko Zergaren kuota likidoan Teknologia Garbien Zerrendan sartutako ekiporen batean egindako inbertsioaren zenbatekoaren % 30 kendu ahal izango dute.
Kenkaria bateragarria da mikroenpresen eta enpresa txikien amortizatzeko askatasunarekin eta enpresa ertainen amortizazio azeleratuarekin, sozietateen gaineko zergaren foru-arauen 21. artikuluarekin bat.
Zerga-onura hiru lurralde historikoetako Sozietateen gaineko Zergari buruzko Foru Arauen 65. artikuluan jasotzen da.
Indarreko araudiek enpresa bati kenkaria aplikatzeko ezartzen dizkioten gehieneko muga kuantitatiboak eta denborazkoak honako hauek dira:
- Zergaren likidazio batean kenkariak aplikatu ahalko dira kuota likidoaren % 50era arte soilik.
- Kuota nahikoa ez izateagatik kendu ez diren zenbatekoak berehalako eta ondoz ondoko 30 zergaldien likidazioetan aplikatu ahalko dira.
Zerrendan jasotako teknologiek ezaugarriak betetzen dituzte, eta horiek eskuratzen dituzten enpresei onura teknikoa eta ingurumenekoa eskaintzen dizkiete.
Teknologiek ezaugarri hauek dituzte:
- eskuragarriak: industria-eskalan garatuak eta merkatuan eskuragarri daudenak;
- ezarpena mugatua dago, gehienak berritzaileak dira, eta positibotzat jotzen da teknologia transferitu dakiekeen instalazio potentzialen kopurua handia izatea;
- indarrean dagoen ingurumen-legeria gainditzen duten balioak dituzte;
- gehienbat prebentiboak dira, eta ez, ordea, prozesuak amaitzekoak;
- ingurumen-inpaktu global positiboa dute, eskura dauden beste teknologia batzuek baino hobea, eta/edo Euskadiko ingurumen-helburuak betetzen nabarmen laguntzen dute.
Teknologia Garbien Euskal Zerrendako ekipoetan inbertsioak egiten dituzten enpresek nahitaez Ihobe sozietate publikoari jakinaraziko diote egindako inbertsioa, Ihoberen webgunean 
Txosten Arrazoitu bat eskatuko dute.
Teknologia definizioarekin bat datorrela eta inbertsioa aukeragarria dela egiaztatu ondoren, Ihobek edo EEEk, beren jarduketa-eremuen arabera, Txosten Arrazoitu batekin erantzungo diote enpresari. Enpresak txosten hori erantsiko dio sozietateen gaineko zerga izapidetzeko eskatzen den dokumentazioari.
Azken aldaketako data:
