17. artikulua.– Familiekin eta Hezkuntza Komunitatearekin Koordinatzeko Zuzendaritza.

Saileko Zuzendaritzen egiteko orokorrez gain, honako egiteko eta jardun-arlo hauek dagozkio Familiekin eta Hezkuntza Komunitatearekin Koordinatzeko Zuzendaritzari:

1. Hezkuntza-eragileen sarea egitea, haiekin koordinazio- eta komunikazio-estrategia eraginkorra garatzeko.
2. Eskola-komunitatearekiko eta hezkuntza-komunitatearekiko komunikazioa bultzatzea eta koordinatzea, eta familien eta eskola-komunitatearen elkarrizketa eta ohiko arreta zuzentzea.
3. Familiei laguntzea eta koordinazioa eta orientazioa eskaintzea hezkuntza-lanean, eta familien parte-hartzea bultzatzea euren seme-alaben hezkuntza-prozesuan.
4. Eskolako bizikidetza hobetuko duten programak eta estrategiak zabaltzea familiei.
5. Sailen arteko harremanak bultzatzea, ikasleei arreta emateko jarduera koordinatua errazteko.
6. Hezkuntza-sektoreek ikastetxeetako bizitzan parte har dezaten sustatzea.
7. Hezkuntza-arloan, toki-enteekiko lankidetza eta koordinazioa sustatzea.
8. Inguruneko hezkuntza-planak eta beste gizarte- eta hezkuntza-programa batzuk bultzatzea eta monitorizatzea toki-enteekin eta gainerako hezkuntza-komunitatearekin, gizarte-kohesioa eta eskola-bizikidetza sustatzeko eta ikasleen hezkuntza-prozesuari laguntzeko.
9. Familien partaidetzarako organoak (eskola-kontseiluak) arautuko dituzten arau-proposamenak egitea.
10. Toki-administrazioekiko kogobernantza-esparrua garatzea.
11. Hezkuntza-komunitateko kideek eskubideak eta aukerak baliatzeari dagokionez, generoagatiko, sexu-aukeragatiko edo beste edozein motatako desparekotasunik egon daitekeen identifikatzea, eta horiek ezabatzeko behar diren neurriak proposatzea.
12. Ikasleei eta familiei zuzendutako laguntzen eta beken politika diseinatzea, aztertzea, proposatzea eta kudeatzea, Kudeaketa Ekonomikoaren Zuzendaritzarekin elkarlanean.