Dekretua indarrean sartzen denetik, etxebizitza eta zuzkidura-bizitoki guztiek gutxieneko bizigarritasun-baldintzak bete beharko dituzte (7. artikulua).

Bide horretan, Dekretuan ezarritako zehaztasunen eta plangintzan ezarritakoen arteko bateraezintasuna badago, Dekretua betetzeari emango zaio lehentasuna. Horrek salbuespen bakarra izango du: I. Eranskineko I.A.2 atalean ezarritakoa (Osasun-baldintzak - Eraikineko argiztapena eta aireztapena) (Lehen Xedapen Iragankorra).

Era berean, I. eranskineko beste alderdi batzuk aldez aurretik onartutako plangintzarekin bateragarriak ez direnean, Dekretua partzialki bete ahal izateko 10.1 artikuluan ezarritako salbuespena eskatu ahal izango da. Azpimarratu behar da salbuespen hori ezin izango dela erabaki ez CTE-an jasotako baldintzen gainean ezta 80/2022 Dekretuan irisgarritasunari, gutxieneko azalerari eta gutxieneko altuera libreari buruz finkatutako baldintzen gainean ere (10.3 artikulua).

Nolanahi ere, azken xedapenetako lehenengoak hiru urteko epea ezartzen du eraikuntza-ordenantzak 80/2022 Dekretura egokitzeko.

Dekretua indarrean jarri aurretik eraikitako etxebizitza eta zuzkidura-bizitokietan egiten diren birgaitze-obren kasuan, obra horiek I. eranskinean jasotako bizigarritasun-baldintzak lortzera bideratu beharko dira. Baldintza horiek bete ezin badira, Bigarren Xedapen Iragankorrak erreferentziako beste arau-esparru batzuk ezartzen ditu. Nolanahi ere, udal-teknikariek erabakiko dute kasu partikular bakoitzean zenbateraino bete beharko diren I. eranskinean ezarritako alderdiak.

Laburbilduz, indarrean dagoen plangintza eta Dekretua bateraezinak badira, eta aurretik aipatutako xedapenak kontuan hartuta, plangintzaren eta 80/2022 Dekretuaren arteko bateragarritasun-araubidea honela laburbil daiteke:

Ez dago horrelako aukerarik. Aplikazio eremuari buruzko 4. artikuluak dioenaren arabera: “Dekretu honetako gutxieneko bizigarritasun-baldintzak aplikatu behar zaizkie Euskal Autonomia Erkidegoko lurraldean dauden etxebizitza eta zuzkidura-bizitoki guztiei, bai horiek hartzen dituzten eraikinei ere, sustapen publikokoak zein pribatukoak, librekoak nahiz babestukoak izan.” Hortaz, etxebizitza libreek Dekretuan ezarritakoa bete beharko dute, hori indarrean sartzen denean.

Hala ere, lehenengo xedapen iragankorrak honako hau ezartzen du: “indarrean jarraituko dute dekretu hau indarrean jarri aurretik onartutako hirigintza-plangintzako tresnek. Hala ere, arau hau osorik betetzearen eta plangintza horren artean bateraezintasunik balego, dekretu hau betetzea gailenduko da, I. eranskineko A-I.A.2 apartatua izan ezik, eta 10.1 artikuluari heldu ahal izango zaio dekretu hau partzialki betetzeko, bateragarria baita aldez aurretik onartutako plangintzarekin. Halakoetan, ez da beharrezkoa izango salbuespen-aukera hori bertan jasotzea.”

Aurrekotik ondorioztatzen da etxebizitza libreek Dekretuan ezarritakoa bete behar dutela Dekretua indarrean jartzen denean, baina, udal-ordenantzak Dekretura egokitu arte, eta goian deskribatutako egoera gertatzen bada, bi aukera egongo dira: alde batetik, I-A.2 eranskinaren atala bete ezin bada, ez da zertan bete beharko, eta bestetik, udalak baimendu ahal izango du bateragarriak ez litezkeen gutxieneko bizigarritasun-baldintzak betetzetik salbuestea. Salbuespen hori baimentzeko, aukera hori plangintzan aurreikusita egon beharko da, azken xedapenetako lehenengoan ezarritako hiru urteko epea amaitu ondoren.

Salbuespen horiek 10.3 artikuluan deskribatutako mugak izango dituzte (irisgarritasuna, gutxieneko azalera eta etxebizitzen eta bizitokien gutxieneko altuera librea), eta artikulu bereko 5. eta 6. puntuetan deskribatutakoaren arabera egingo dira: aldez aurretik eskatzaileak salbuespena justifikatu beharko du, eta eraginpeko bizigarritasun-baldintzak, alegatutako salbuespen-arrazoien justifikazioa, salbuespenaren xede diren elementuak eta bizigarritasun-baldintzak, eta salbuetsitako elementuen ordezko neurriak).

Nolanahi ere, 80/2022 Dekretua azaroaren 30ean sartuko da indarrean, eta, hirugarren xedapen iragankorraren arabera, egun hori baino lehen eskatutako lizentziak eskaera egin zen unean indarrean zegoen araudiaren arabera emandako lizentziaren aurreikuspenei jarraituz gauzatuko dira, eta, beraz, ez zaizkie aplikatuko I. eranskinean jasotako gutxieneko bizigarritasun-baldintzak.

Babes Ofizialeko Etxebizitzen Diseinurako Ordenantzak onartzen dituen Etxebizitza eta Gizarte Gaietako sailburuaren 2009ko otsailaren 12ko Agindua indargabetu egiten da 80/2022 Dekretuaren Hirugarren Xedapen Indargabetzailean; beraz, Dekretua indarrean jartzen denean, Babes Publikoko Etxebizitzen diseinuari dagokionez, indarrean egongo den arau bakarra 80/2022 Dekretua izango da, eta I. eta II. eranskinak bete beharko dituzte horiek.

Etxebizitza libreei dagokienez, I. eranskina nahitaez bete beharrekoa da, eta plangintzak babes publikoko araudiari erreferentzia egiten badio, II. eranskina bete behar izatea edo ez, ezarritakoaren literaltasunaren araberakoa izango da. Horri dagokionez, esan behar da bigarren eranskin horrek azalera erabilgarriaren gehieneko mugak definitzen dituela bere edukian, babes publikoko etxebizitzen kalifikazioari begira; beraz, ulertzen da ez diotela eragiten etxebizitza libreari.

Lehenengo xedapen iragankorrak, bigarren puntuan, honako hau ezartzen du: “indarrean jarraituko dute dekretu hau indarrean jarri aurretik onartutako hirigintza-plangintzako tresnek. Hala ere, arau hau osorik betetzearen eta plangintza horren artean bateraezintasunik balego, dekretu hau betetzea gailenduko da, I. eranskineko A-I.A.2 apartatua izan ezik, eta 10.1 artikuluari heldu ahal izango zaio dekretu hau partzialki betetzeko, bateragarria baita aldez aurretik onartutako plangintzarekin. Halakoetan, ez da beharrezkoa izango salbuespen-aukera hori bertan jasotzea.”

Era berean, azken xedapenetako lehenak honako hau ezartzen du: “Udalek, hiru urteko epean, arau honen xedapenetara egokitu beharko dituzte haien eraikuntza-ordenantzak.”

Aurrekotik ondorioztatzen da, bien arteko bateraezintasuna gertatuz gero, Dekretua gailenduko dela beti, I-A.2 eranskina izan ezik, hura ez betetzeko aukera egongo baita salbuespena eskatu beharrik gabe. Beraz, eraikinaren orientabideei dagokienez, alderdi hori plangintza berriak onartzearen mende geratzen da.

Indarrean dagoen plangintzaren eta Dekretuaren arteko bateraezintasunak I. Eranskineko beste atal batzuei eragiten badie, azken xedapenetako lehenak ezarritako hiru urteko epean, 10. artikuluan zehaztutakoa bete beharko da salbuesteko: eskatzaileak aldez aurretik justifikatu beharko du, memoria bidez, lizentzia eman aurretik. Kasu horretan, harik eta udal-eraikuntzako ordenantzak 80/2022 Dekretura egokitu arte, ez da beharrezkoa izango hirigintza-plangintzak salbuespen-aukera hori aurreikustea, udalak eman ahal izan dezan. Hiru urteko epea igaro ondoren, 80/2022 Dekretuaren 10. artikuluan zehaztutako salbuespen motaren bati heldu ahal izateko, hirigintza-plangintzak berariaz jaso beharko du, baldintza hori beharrezkoa ez duten proiektu berritzaileen kasuan izan ezik.

Hiru urteko epea igaro ondoren, 80/2022 Dekretuaren 10. artikuluan zehaztutako salbuespen-motaren bati heldu ahal izateko, hirigintza-plangintzak berariaz jaso beharko du, baldintza hori beharrezkoa ez duten proiektu berritzaileen kasuan izan ezik.

Nolanahi ere, Udalari dagokio salbuespena baimentzea, betiere interesdunak eskatuta eta 10.1 artikuluan ezarritakoari jarraituz.

Babes publikoko etxebizitzen eta zuzkidura-bizitokien kasuan, eta babes publikoko kalifikazioari dagokionez, Eusko Jaurlaritzako etxebizitza-arloko eskumena duen sailaren baimena ere beharko da (10.5 artikulua), udal-sustapeneko etxebizitza tasatuen kasuan izan ezik, horien kalifikazioa Udalari berari baitagokio, 3/2015 Legearen 30. artikuluaren arabera.

Lokalen erabilera aldaketa, hori etxebizitza bilakatzen duena, aurrez existitzen ez den etxebizitza berri bat ezartzea dela ulertu behar da; izan ere, ez du bigarren xedapen iragankorrean eskatzen den bizitegi-erabilerarako udal-lizentziarik, gutxieneko bizigarritasun-baldintzak betetzen direla ondorioztatzeko. Beraz, erabilera aldaketetan I. eranskina nahitaez bete beharko da, baita I. eranskinaren I-A.2 atalari dagokionez ere. Hala ere, Lehen Xedapen Iragankorrean jasotzen den bezala, 80/2022 Dekretua indarrean jarri aurretik onartutako plangintzek indarrean jarraitzen dute, eta, bien arteko bateraezintasuna gertatuz gero, aipatutako I-A.2 atala ez betetzea egongo da, plangintza berri bat egokitu arte salbuespena eskatu beharrik gabe.

Hortaz, indarrean dagoen udal-plangintzak horrelako erabilera aldaketak espreski onartzen baditu, I-A.2 atala bete gabe horiek gauzatzeko aukera egongo da. Ordez, plangintzak ez baditu aurreikusten, horiek gauzatzeko I. eranskina guztiz bete beharko da.

Bateraezintasunak I. eranskineko beste alderdi batzuei eragiten badie, 10. artikuluan ezarritako salbuespena eskatu ahal izango da. Azken kasu horretan, udal-teknikariek erabakiko dute zenbateraino bete beharko diren I. eranskineko ezarpenak.

Soilik, beste erabilera batzuk dituzten solairuei ere eragiten dieten eraikinen birgaitze integralen kasuan, eta solairu horiek etxebizitza bihurtzea aurreikusten bada, ez dira behartuta egongo I-A.2 apartatua betetzera, eta 10. artikuluan ezarritako salbuespena eskatu ahal izango dute I. eranskineko beste baldintza batzuk bete ezin badituzte. Azken kasu horretan, udal-teknikariek erabakiko dute zenbateraino bete behar diren.

Hala ere, 1. Xedapen Iragankorrean ezarritakoa kontuan hartuta, 80/2022 Dekretua indarrean jarri aurretik hasieran onetsitako indarreko plangintzek aurreikusten badute lokalak etxebizitza bihurtzea eta horiek ezin badute I-A.2 apartatua bete, ez egiteko aukera izango dute ordenantzak Dekretura egokitu arte.

Etxebizitzen banaketari dagokionez, hasierako etxebizitzak erabilera horretarako udal-lizentzia duela kontuan hartuta, bereizketa hori birgaitzetzat har daiteke, IV. eranskinean ezarritakoaren arabera. Eta horrenbestez, Bigarren Xedapen Iragankorraren 3. eta 4. ataletan ezarritakoa aplikatuko zaio. Horien arabera, birgaitze-obra horiek I. eranskinean jasotako bizigarritasun-baldintzak lortzera bideratu behar dira, eta, bertan ezarritako baldintzak lortu ezin badira, 317/2002 Dekretuaren zehaztapenetan ezarritakoa beteko da gutxienez. Udal-teknikarien interpretazioaren mende geratzen da kasu bakoitzean zeintzuk izango diren bete behareko gutxieneko bizigarritasun-baldintza.

Nolanahi ere, banaketatik sortzen diren etxebizitzek ezarritako gutxieneko azalera bete beharko dute, eta jatorrizko etxebizitza ezin izango da bereizi hori bete ezin bada.

Aurreko erantzunaren ildoari jarraituz, I. eranskineko I-A.3 atalak honako hau ezartzen du: ”Ziurtatuko da eraikinak ibilbide irisgarria daukala, irisgarritasun unibertsaleko irizpideen arabera, hura osatzen duten etxebizitzetako bakoitzera heltzeko.” Hortaz, erabilera aldatzeko, etxebizitza berriak ibilbide irisgarria izan beharko du.

I. eranskineko I-B.4 atalak ezartzen duenez, etxebizitzaren gutxieneko oinarrizko programak kanpoko espazio bat barne hartzen du, eta espazio horretarako 4 m²-ko gutxieneko azalera erabilgarria ezartzen da.

Nolanahi ere, kanpoko espazio hori terraza izan daiteke, baina beste aukera batzuk ere badaude, hala nola balkoiak edo logiak, arauak 6.5 artikuluan iradokitzen duen bezala. Eta, era berean, etxadi- edo argi-patioetan kokatuta egon daitezke, betiere I-A.2 atalean ezarritakoaren arabera kanpoko espaziotzat har badaitezke.

Era berean, goian aipatutako atalean honako hau ezartzen da: “kanpoko espazio horren ordez neurri bereko begiratoki itxi bat jarri ahal izango da, edo, halakorik ezean, egoteko espazioa 8 m2-tan handitu ahal izango da, apartatu honen 4. puntuko taulan adierazitako gutxienekoa oinarri hartuta. Kasu horietan, azalera konputagarria izango da ondorio guztietarako.”

Horregatik guztiagatik, I. eranskina betetzeko aukera desberdinak daudela ulertzen da, baita beheko solairuetan kokatutako lokalen erabilera aldatzen bada ere.

Lehenengo Xedapen Iragankorrak ezartzen du aurretik onartutako plangintzak indarrean jarraitzen duela, baina bateraezintasunen kasuan Dekretua nagusitzen du, I-A.2 atala izan ezik. Beraz, alderdi hori indarrean dagoen plangintzan aplikatu ahal izan beharko litzateke, plangintzak hori bideraezin bihurtzen duen debeku edo mugaren bat badu salbu.

Kasu horietarako erabilgarria da I-B.4 atala, kanpoko espazioa ordezkatuta Dekretua betetzeko aukerak ezartzen dituena.

Birgaitzeetan, gainera, aurretiko existentziak direla-eta, gerta daiteke I. eranskineko zehaztapen guztiak bete ezin izatea, eta, horregatik, Bigarren Xedapen Iragankorrak honako hau ezartzen du: “Aurreko apartatuetan aipatzen diren etxebizitzetan eta zuzkidura-bizitokietan egiten diren birgaitze-obrek etxebizitza-erabilerarako egokiak direla egiaztatzeko baldintzak lortu edo hobetzeko beharrezko diren aldaketak bete beharko dituzte, dela etxebizitza isolatu gisa, dela eraikin baten parte gisa, eta dekretu honen I. eranskinean jasotako bizigarritasun-baldintzak lortzera bideratu beharko dira.” Kasu horretan, bete beharreko parametroen eta bete ezin direnen interpretazioa udal-teknikarien esku geratuko da.

Araudi berria idazteko beharrari dagokionez, Azken Xedapenetako Lehenengoak hiru urteko epea ezartzen du eraikuntza-ordenantzak egokitzeko, baina komeni da hala eskatzen duten plangintza xehatuak lehenbailehen egokitzea, bateraezintasunak eta kontraesanak saihesteko.

Sustapena publikoa edo pribatua bada ere, proiektu bat 80/2022 Dekretuaren 10.2.b) artikuluan ezarritako gutxieneko bizigarritasun-baldintzak betetzetik salbuesteko kasuaren barruan egoteko, hurrengoa bete behar du: proiektu hori izaera ofizialeko ikerketa-, garapen- eta berrikuntza-programa batean sartuta egon beharko da, komunitate zientifikoak, esparru akademikoak, Europako erakundeek edo I+G+Bko beste programa publiko batzuek bermatutakoa; edo, bestela, ekimen publikoko etxebizitza-sustapenen kasuan, baldin eta sektore publikoko kontratazioaren araudiarekin bat datorren epaimahaiaren esku-hartzea duen lizitazio baten ondorio izatea, betiere, haren xede espezifikoa etxebizitzaren edo arkitekturaren arloko berrikuntza eta esperimentazioa bada.

Esparru horietatik kanpo ideia berritzaileak planteatu nahi izanez gero, 80/2022 Dekretuan ezarritakoa ere bete beharko da.

Hirugarren xedapen iragankorrak ezartzen duenez, aplikatu beharreko araudia lizentzia eskatzeko unean indarrean dagoen araudia izango da: “Bizitegi-erabilerarako eraikin berrietan eta etxebizitzarako edo zuzkidura-bizitokirako birgaituko diren eraikinetan, baldin eta arau hau indarrean jarri aurretik obra-lizentzia eskatu bada, obrak emandako lizentziaren aurreikuspenen arabera egikarituko dira, eskabidea egin zen unean indarrean zegoen araudiaren arabera.”

Bigarren xedapen iragankorrak honako hau ezartzen du: “Egonkortasunari, segurtasunari, iragazgaiztasunari eta egitura-finkapenari dagokienez oinarrizko baldintzak betetzen dituzten etxebizitzek gutxieneko bizigarritasun-baldintzak betetzen dituztela ulertuko da, baldin eta dekretu hau indarrean jarri aurretik udal-lizentzia badute”, beraz, higiezin horiek etxebizitza gisa erabiltzeko udal-lizentzia badute, xedapen hori aplikatuz, bizitzeko modukoak direla ulertuko da.

Aipatutako udal-lizentziarik izan ezean, xedapen iragankor berak erreferentziako arauak ezartzen ditu eraikina eraiki zen urtearen arabera, bizigarritasun-baldintzak betetzen dituela ondorioztatzeko.

Nolanahi ere, galderan emandako datuen arabera, aipatutako higiezinak ez du betetzen zehaztutako araudi horietako bat ere, eta, beraz, ezin izango litzateke legeztatu.

80/2022 Dekretuaren 17. artikuluaren lehen apartatuan ezartzen denez, etxebizitzen gutxieneko bizigarritasun-baldintzak betetzen direla egiaztatzeko, 38/1999 Legean aurreikusitakoaren araberako teknikari eskudun batek txosten bat egin beharko du. Txosten horretan, kontserbazio-, segurtasun-, estankotasun- eta egitura-finkapeneko baldintzak jasoko dira, besteak beste. Aukeran, aipatutako horiek, eta hala badagokio, EITaren eta dagozkion akatsak zuzentzeko ziurtagirien bidez ere egiazta daitezke, betiere dokumentuok 117/2018 Dekretuaren arabera erregistratuta badaude.

80/2022 Dekretuak ez du aldatzen 20/1997 Legearen artikulurik, ezta beste legerik ere. Bestalde, 68/2000 Dekretuari egindako aldaketak azken xedapenetako lehenengoan eta bigarrenean zehazten dira.

Era berean, etxebizitzek eta zuzkidura-bizitokiek nahitaez bete beharko dituzten bizigarritasun-baldintza berriak jasotzen du, horietako batzuk irisgarritasunarekin lotuta. Zioen azalpenean zehazten denez: “Arauak, gaur egun indarrean dagoen araudian eraikinetarako jasotzen diren baldintzak bere egiteaz gain, etxebizitzen barruan bete behar diren irisgarritasun-irizpideak eta -baldintzak ezartzen ditu oro har, horiek legeak agintzen duen etxebizitza egokituen erreserba-zuzkidurakoak izan ez arren, gerora desgaitasunen bat sortzen denean pertsonek etxebizitza duin, egoki eta irisgarria izaten jarraitu ahal izan dezaten.”

Besteak beste, honako hauek aurki daitezke:

1.- Eraikinetarako eta etxebizitza bakoitzerako sarrerari dagokionez: sarreren irisgarritasuna eraikin eta etxebizitza guztietara hedatzen da (I-A.3)

2.- Etxebizitzaren gutxieneko oinarrizko programak 1,20 m-ko diametroko zirkunferentzia bat inskribatu ahal izango du, ekipamendu finkorik gabekoa eta 0,70 m-rainoko garaierarekin, eta zirkulazio-espazioek 1,00 m-ko zabalera izan beharko dute (I-B.3). Gainera, geletan 0,85 m-ko pasabideak ahalbidetuko dituzten altzariak jartzeko aukera eman beharko da (I-B.4).

3.- Maila desberdinetan garatzen diren etxebizitzek translazio bertikaleko plataforma bat instalatzeko behar den espazioa aurreikusi beharko dute, 68/2000 Dekretuan ezarritako ezaugarrien arabera, nahiz eta hura instalatzea ez den nahitaezkoa izango (I-A.3).

4.- Balkoi edo terraza motako kanpoaldeko espaziorako sarrera, koskarik gabeko eta aldapa handirik gabeko a izan beharko da, eta hustubide eta burdin sareetako baoen tamaina mugatzen da.

Alderdi horiek guztiek etxebizitzaren erabilera erraztea dute helburu, obra edo aldaketa handirik egin gabe, ezusteko ezintasunen edo aldi baterako ezintasunen kasuan.

Irisgarritasun-irizpide horiek arauan sartzen dira, eta etxebizitzaren bizigarritasun-eskakizunen parte bihurtzen dira.

I. eranskineko A.2 eta B.2 ataletako alderdi jakin batzuen arteko lotura zuzena dela eta, Dekretua eta indarrean dagoen plangintzaren arteko A.2 ataleko lehentasun-salbuespena (1XI), B.2 atalera zabaldu daiteke hurrengo baldintzak betetzekotan soilik:

• Plangintzaren eta 80/2022 Dekretuaren artean benetako bateraezintasun justifikatua dagoenean. Ez da baliozkoa argudiatzea irtenbide bat hobea dela 80/2022 Dekretua bete gabe, baldin eta hori betetzea ahalbidetzen duen irtenbide bat aurkitu badaiteke.
• B.2 atalaren alderdi hauetan, ez besteetan
  • Iparraldera, ipar-mendebaldera edo ipar-ekialdera orientatutako oin berriko etxebizitzak egitearen debekua.
  • “Kanpoko etxebizitza”ri dagozkion baldintzak betetzea. Ezinezkoa bada guztiz betetzea, ahal den neurrian bete beharko dira baldintzok.

Dekretua indarrean jarri aurretik dauden eraikin guztiek bizigarritasun-baldintzak betetzen dituztela ulertzen da (2. xedapen iragankorra), baldin eta dagokien udal-lizentzia badute eta egonkortasunari, segurtasunari, estankotasunari eta egitura sendotzeari buruzko oinarrizko baldintzak betetzen badituzte. Horregatik, ez da beharrezkoa etxebizitza horietan obrarik egitea I. eranskinean ezarritako baldintzetara egokitzeko, hau da, ez da nahitaezkoa kanpoko espazio bat sortzea, halakorik ez badute.

Bestalde, lehendik dagoen eraikin batean oin berriko kanpo-espazioak eraiki nahi badira (balkoiak, terrazak, logiak, etab.), honako hauek hartu beharko dira kontuan:

• Kanpoko espazio berriak eraikitzeko aukera hori indarrean dagoen plangintzaren gainetik egiteko aukera egon behar du, izan ere, Dekretua plangintzari gailentzen zaio (1.2 xedapen gehigarria). Hala ere, plangintzak espresuki debeku edo mugapen espezifikoren bat badu eta, horren ondorioz, kanpoko espazio berriok bideraezin bihurtzen baditu, ezingo dira horiek egin. Egoera horretan, baloratu beharko da 80/2022 Dekretuak alderdi hori betetzeko hainbat aukera eskaintzen dituela, eta kanpoko espazioen ordez begiratoki itxiak edo egoteko espazioan azalera minimoaren gainetiko azalera gehigarria aurreikustea ere balizkoa dela.
• Aipatutako muga horiek egonez gero, I.eranskinaren alderdi hori salbuesteko aukera kontuan hartu beharko litzateke.
  • Ordenantzak egokitu arte, plangintzan salbuespen hori aurreikusita egon beharrik gabe.
  • Ordenantzak egokitu ondoren, horietan salbuespena aurreikusiz, espazio horiek eragozten dituzten parametroak ezabatu edo aldatu ezin direnean eta hori ahalbidetzen duten berriak sartu ezin direnean bakarrik.
• Eraikigarritasuna agortuta izanez gero, ezin izango da etxebizitza bakoitzeko 10 m²-ko muga gainditu, izan ere, kanpoko espazioetako azalera hori (ez, ordea, horiek ordezteko alternatibena) ez baita konputagarria (6.5 artikulua).
• Nolanahi ere, 6/2019 Legeak edo beste araudi sektorial batzuek babestutako eraikinetan (eta monumentu-multzoetan), babes-araubide horietan ezarritakoa lehenetsiko da (4.3 artikulua) kanpoko espazioak sartzearen gainetik, hura babes horrekin bateragarria ez denean.
• Kanpoko espazio berria eraikitzea (balkoia, terraza, logia, etab.) edo lehendik dagoen bat handitzea (I-B.4) bizigarritasun-parametroen barruan sartzen dela kontuan hartzea. Hau da, etxebizitza batek 4 m2-tik gorako kanpo-espazioa badu (markatzen den gutxienekoa), hura handitzea ez litzateke beharrezkotzat joko bizigarritasunari dagokionez (baina bai posible). Edo kanpo-espaziorik ez duen etxebizitza batean, baldin eta bertan egoteko espazioak logela kopuruaren arabera dagokion gutxieneko azalerari gehitutako 8 m2-tik gorako azalera badu (kanpoko espazioen gutxienekoaren bikoitza), ez da beharrezkotzat joko kanpoko espazio bat izatea bizigarritasunari dagokionez.

80/2022 Dekretuak ezartzen du eraikuntza-ordenantzak hiru urteko epean egokitu beharko direla (azken xedapenetako lehena, 2025eko azaroaren 30a baino lehen); ez, ordea, beste plangintza-dokumentu batzuk. Hala ere, komeni da plangintza xehatua egokitzea, 80/2022 Dekretua betetzeari eragiten dioten zehaztapenak sartzen diren kasuetan, Dekretuan ezarritako baldintzak hobeto eta modu ordenatuagoan betetzeko hala behar duten arloetan.

Ordenantzak eta plangintza I. eranskinean ezarritakora egokitzeko mailari dagokionez:

• Lurzoru urbanizagarrian ezarritako baldintza guztiak bete beharko direla ulertzen da.
• Hiri-lurzoruan (finkatua eta finkatugabea), espazio publikoari eragiten diotelako edo beste arrazoi batzuengati I. eranskineko alderdi batzuk betetzea bideraezin edo ez gomendagarri egin dezaketen aldez aurreko baldintzak daudenez, alderdi horietatik salbuesteko aukera aurreikusi ahal izango da (10.1 eta 10.2.a artikuluak), betiere modu justifikatuan. Salbuespen hori eraikinen edo lurzatien morfologiak I. eranskinean ezarritakoa betetzea eragozten duen eremuetan baino ezingo da ema. Adibidez:
  • Kalearen profila, neurriak edo hiri-lurzoru finkatuaren beste baldintzatzaile batzuk direla-eta, fatxadako elementu irtenak edo beste alderdi batzuk baztertzea komeni ez den eremuetan, plangintzak eta ordenantzek 80/2022 Dekretuan aurreikusitako kanpoko espazioekiko beste irtenbide alternatibo batzuk aurreikus ditzakete (begiratoki itxiak, espazio gehigarria egonleku-espazioan- I-B.4.4), eta, azken aukera bezala, salbuespena ere aurreikus dezakete.
  • Partzelarioa zehaztua duten zonetan (10.2 art.), partzelarioaren ondorioz I-A.2 edo I-B.2 ataletako alderdi batzuk betetzea ezinezkoa bada, salbuestea aurreikus daiteke.

  Nolanahi ere, inplementa daitezkeen I. eranskineko gainerako parametroetara egokitu beharko dira.

• 6/2019 Legeak monumentu-multzo gisa babestutako eremuen kasuan, ordenantzek 80/2022 Dekretuari jarraituko diote, ezarritako babes-araubidera egokituz

7. artikuluan ezartzen denaren arabera, etxebizitzak eta zuzkidura-bizitokiak birgaitzeko egiten diren jarduketek I. eranskinean jasotako gutxieneko bizigarritasun-baldintzak bete beharko dituzte. Eta arrazoiren batengatik I. eranskinean ezarritako baldintzaren bat bete ezin badaiteke, hori birgaitzearen garrantziaren arabera modu ezberdin batean tratatuko da:

• BIRGAITZE INTEGRALETAN (ikus definizioa IV. eranskinean), OBRA BERRIETAN bezala, Udalari eta, hala badagokio, Eusko Jaurlaritzako Etxebizitza Sailari eskatu beharko zaio bete ezin diren alderdiak betetzetik salbuesteko (ikus 10. artikulua). Salbuespen horiek ezin izango dira eman I. eranskinean finkatutako etxebizitzen eta zuzkidura-bizitokien irisgarritasunari, gutxieneko azalerari eta gutxieneko altuera libreari lotutako alderdietan, ez eta EKTa betetzeari dagokionez ere.
  
  Salbuespena ez da eskatu beharko, soilik, bete ezineko baldintza hori I-A.2 eranskineko atalaren esparrukoa denean (ikus 1.2 ohiko galdera).
  
  80/2022 Dekretua aplikatzearen ondorioetarako, ERABILERA ALDAKETAK etxebizitza berritzat hartuko dira (ikus 1.7 ohiko galdera). 
  
  
• BIRGAITZEETAN (ikus definizioa IV. eranskinean), egiten diren obrak I. eranskinean ezarritako bizigarritasun-baldintzak lortzera bideratu beharko dira (2.XI). Hau da, I. eranskinean ezarritakoa bete beharko da hori betetzea bideragarria denean, eta, ezinezkoa bada, proiektuan justifikatu beharko da.
  
  Horrela, baldintzaren bat betetzea ezinezkoa bada, indargabetutako 317/2002 Dekretuaren IV. eranskinean ezarritako pareko zehaztasunak bete beharko dira. Eta, altuera- edo azalera-mugagatik edo argiztapen-bao berriak irekitzea ezinezkoa izateagatik aurrekoak bete ezin badira, gutxienez erabilera- eta kontserbazio-egoera onean egoteko irtenbideak hartuko dira, egonkortasunari, segurtasunari, estankotasunari eta egitura sendotzeari buruzko oinarrizko baldintzak betez.
  80/2022 Dekretua aplikatzearen ondorioetarako, ETXEBIZITZEN ERREFORMAK ETA ETXEBIZITZEN ZATIKETA birgaitzetzat hartuko dira, baina etxebizitzen zatiketaren kasuan, kontuan izan behar da zatiketaren ondorioz sortzen den etxebizitza bakoitza hurrengoa bete beharko duela:
  • 35 m²-ko gutxieneko azalera erabilgarria izan.
  • Gutxieneko oinarrizko programa osoa bete.

 Taula honetan, I. eranskineko alderdiren bat betetzea ezinezkoa bada egin beharreko jarduketak laburbiltzen dira, jarduketa motaren arabera: