Dekretu honen xedea da Lurzoruari eta Hirigintzari buruzko Legea garatzea (2/2006 Legea, ekainaren 30ekoa), honako hauek arautzeari dagokionez:

1. Hirigintza-eraikigarritasunaren mugak.

2. Sistema orokorren eta tokiko sistemen sareei dagozkien hirigintzako zuzkidura-estandarrak.

3. Babes publikoko etxebizitzen estandarra.

4. Zuzkidura-bizitokien estandarra.

Dekretu honetan aurreikusitako ondorioetarako, honako kontzeptu hauek definitzen dira:

1. Hirigintzako estandarra. Hirigintza-jarduketen hiri-kalitatearen parametro batzuk bermatzeko helburuarekin ezartzen diren arau-mugak dira. Dekretu honetan, orokorrean, gutxienekoak ezartzen dira zuzkidura publikoen eta etxebizitza babestuaren azalerei dagokienez, eta gehienekoak, eraikigarritasunari dagokionez.

2. Aurretiaz gauzatutako hirigintza-eraikigarritasuna. Lehendik gauzatuta dagoen eraikigarritasuna, lehendik dauden eta hirigintza-plangintzan ezarritako hirigintza-antolamenduarekin bat datozen eraikuntza eta erabilerena. Udal-lizentzia jaso duen hirigintza-eraikigarritasuna sartzen da eraiki gabe edo eraikitze prozesuan badago ere.

3. Aurreko hirigintza-antolamenduak esleitutako eta gauzatu gabeko hirigintza-eraikigarritasuna. Aurreko hirigintza-plangintzan aurreikusitako erabilera zehatz batzuetara bideratutako hirigintza-eraikigarritasuna da, zeina oraindik ez baita orubean edo lurzati eraikigarrian gauzatu. Aurreko plangintzatzat hartu behar da gauzatu gabeko eraikigarritasun hori jatorrian antolatu zuena.

4. Hirigintza-erabilera nagusia.

   1. Hiri-lurzoru finkatugabean:

      1. Zuzkidura-jarduketari lotuta: lurzati eraikigarrian edo orubean aurreikusitako erabilera bereizgarriari dagokiona, indarrean dagoen antolamendu xehatuan ezarritakoaren arabera.

      2. Jarduketa integratuari lotua: jarduketa integratuaren eremuan kalifikazio orokorra mugatuta duen hirigintza-zonako erabilera bereizgarriari dagokiona. Erabilera orokor desberdinak (bizitegiak, industria eta hirugarren sektorea) dituzten bi zona edo gehiago mugatzen badira, horietako bakoitzaren bereizgarriarekin bat dator.

   2. Lurzoru urbanizagarrian:

      Sektorean kalifikazio orokorra mugatuta duen hirigintza-zonako erabilera bereizgarriari dagokiona. Erabilera orokor desberdinak (bizitegiak, industria eta hirugarren sektorea) dituzten bi zona edo gehiago mugatzen badira, horietako bakoitzaren bereizgarriarekin bat dator.

5. Zuzkidura-sarea.

   Lurzoruari eta Hirigintzari buruzko Legearen (2/2006 Legea, ekainaren 30ekoa) 54. eta 57. artikuluetan araututako udalerriko sistema orokorren eta tokiko sistemen sareetako elementuen multzoa, zuzkidura-helburuetarako, hirigintzako zuzkidura-estandarren xede izan edo ez.

6. Hiri-lurzoruko tokiko zuzkidura.

   Hiri-lurzoruko zuzkidura propioa, lurzoru multzoek, azalera eraikiek eta erabilera guztietarako edo honako batzuetarako elementuek eta instalazioek osatua: espazio libreak eta berdegune publikoak; ekipamendu publikoak eta pribatuak; komunikazioko gune, sare eta elementu publikoak (oinezkoentzat, bizikletentzat, ibilgailu motordunentzat, irisgarritasun-instalazioak); hiri-zerbitzuen azpiegiturak (ur-hornidura; saneamendua; energia elektrikoa eta argiteria; telekomunikazioak; gasa eta antzeko beste batzuk), prestazio-araubidea edozein dela ere.

   Erabilera eta helmuga horien zehaztapena eta identifikazioa, bai eta horien edukia ere, Lurzoruari eta Hirigintzari buruzko Legearen (2/2006 Legea, ekainaren 30ekoa) 57. artikuluan ezarritako xedapenetara eta dekretu honetan adierazitakora egokituko dira.

   Ekipamendu pribatuen erabilera berberetara bideratutako hirugarren sektoreko erabilerak horiekin integratu ahal izango dira, aipatutako hiri-lurzoruaren zuzkiduran sartzeko.

7. Aparkalekua.

   Lau gurpil edo gehiagoko ibilgailu motordunak, motozikletak, bizikletak, gurpil-aulkiak eta plangintzan behar bezala justifikatuta dauden beste batzuk aparkatzeko espazioaren zuzkidura. Espazioa estalia edo estali gabea izan daiteke, irekia edo itxia, sestra gainean edo azpian egon daiteke, eta jabari publiko edo pribatuan.

   Nolanahi ere, dekretu honetan zehazten diren eta hirigintzako estandarrari lotuta dauden ibilgailuak lau gurpil edo gehiagoko ibilgailu motordunak eta bizikletak dira, eta ez dira sartzen hirigintza-plangintzak, hala badagokio, eska ditzakeen bestelako ibilgailuei dagozkien aparkalekuak.

8. Lurzoru iragazkorra eta berdegunea.

   Lurzoru iragazkorrak barne hartzen du bai natura-lurzorua, bai lorategi bihurtutakoa, bai eta drainatze-gaitasuna hobetzeko egokiak diren material eta elementu iragazkorrekin urbanizatutakoa ere.

   Berdeguneak barne hartzen du bai lurzoru naturala, bai lorategiekin edo berdeguneekin urbanizatu beharreko lurzoru iragazkorra, posible baita bertan landatzea.

9. Gainjarritako hirigintza-zonifikazioa.

   Hirigintza-kalifikazioko teknika, erabilera pribatiboko edo jabari publikoko hirigintza-zona globalen edo azpizona xehatuen zenbait tipologia gainjartzean datzana (sestran, lurpean edo hegalean), hirigintza-estandarren xede diren zuzkidurak antolatu eta ezartzeko esparru posible gisa. Gainjartze hori natura- edo kultura-babes motaren bat duten zona edo azpizonetan gertatzen bada, horretarako berariaz onartutako araudia beteko da.

10. Azpizona xehatua.

    Hirigintza-plangintzan zehaztutako antolamendu xehatuaren ondoriozko lurzati edo espazio urbanistikoki bereizia.

11. Zuzkidura-jarduketa.

    Zuzkidura-jarduketatzat hartuko da: eraiki daitekeen lurzatian edo orubean egiten dena; bertan, beharrezko zuzkidurak osatu behar dira, plangintza berrian aurreikusitako hirigintza-eraikigarritasunaren gehikuntzarekin duten proportzioa egokitzeko, eta ez da beharrezkoa dagoen urbanizazioa eraberritzea edo berritzea.

    Era berean, zuzkidura-jarduketatzat hartuko da lurzati eraikigarrian gertatzen dena, baldin eta, aurreko hirigintza-plangintzak xehatutako hirigintza-antolamendua izan arren, haren garapenetik kanpo lortu bada urbanizazioa; horretarako, plangintza berriak beharrezko zuzkiduren lagapenak osatzeko beharra identifikatzen du, hirigintza-antolamendu berriak esleitutako hirigintza-eraikigarritasunarekiko proportzioa berregokitzeko, eta ez da beharrezkoa izango, plangintza berriaren arabera, dagoen urbanizazioa eraberritzea edo berritzea.

12. Gaur egungo biztanleria.

    Erreferentziako lurraldean bizi diren pertsona guztiek osatzen dutena, hau da, erreferentziako unean erroldatuta daudenek, bertan daudenek edo ez daudenek, eta udal-erroldaren ziurtagiriaren bidez egiaztatuta daudenak.

1. Lurzoruari eta Hirigintzari buruzko Legearen (2/2006 Legea, ekainaren 30ekoa) 77. artikuluan ezarritako gutxieneko eta gehieneko hirigintza-eraikigarritasunaren estandarrak betetzeko, artikulu horretan ezarritakoez gain, honako baldintza hauek bete beharko dira:

   1. Nagusiki bizitegitarako diren hirigintza-garapenetan:

      1. Jarduketa integratu baten bidezko jarduna xede duen hiri-lurzoruan aurreikusita, eraikigarritasunaren estandarra betetzeko, jarduketa integratuaren eremuan antolatutako sestra gaineko hirigintza-eraikigarritasunaren eta eremu horren azaleraren arteko erlazioa kalkulatuko da, salbu eta eremuan sartutako edo hari atxikitako sistema orokorren sarearen zuzkiduretara bideratutako lursailena, artikulu honen 1.c) apartatuan adierazitakoa kontuan izanda.

      2. Estandarra betetzeko, lurzoru urbanizagarri sektorizatuan aurreikusten dena, sektore bakoitzeko bizitegi-tipologiako zona globalean edo globaletan antolatutako sestra gaineko hirigintza-eraikigarritasunaren eta eremu horien azaleraren arteko erlazioa kalkulatuko da, salbu eta eremuan sartutako edo hari atxikitako sistema orokorren sarearen zuzkiduretara bideratutako lursailena, kontuan hartuta artikulu honen c) apartatuan adierazitakoa.

   2. Nagusiki industria-erabileretara edo hirugarren sektoreko erabileretara bideratutako hirigintza-garapenetan, eraikinek eremuaren edo sektorearen azaleraren % 30 hartu beharko dute, gutxienez, bai hiri-lurzoru finkatugabean, bai lurzoru urbanizagarrian.

   3. Hiri-lurzoruko jarduketa integratuko eremu bat edo lurzoru urbanizagarria duen sektore bat hainbat tipologiatako erabilera nagusiak (bizitegia, industria edo hirugarren sektorea) dituzten hirigintza-zona globalez osatuta dagoenean, zona bakoitzeko estandarra betetzea, alde batetik, aurreko apartuetan ezarritako irizpideetara egokitu beharko da.

      Era berean, artikulu honen aurreko bi apartatuetan aurreikusitako kasuetan, estandarrak kalkulatzeko, zona bakoitzean kendu ahal izango dira bertan sartuta dauden eta araudi sektoriala aplikatuta eraiki ezin diren lurzoru-azalerak.

2. Gobernu Kontseiluak, Euskal Autonomia Erkidegoko Lurralde Antolamendurako Batzordearen aldeko irizpena jaso ondoren, gutxieneko eta gehieneko eraikigarritasuna gutxitzeko edo gehitzeko baimena eman ahal izango du, Lurzoruari eta Hirigintzari buruzko Legearen (2/2006 Legea, ekainaren 30ekoa) 77. artikuluko 2. eta 6. paragrafoetan ezarritako kasuetan. Testuinguru horretan, gainera, lege horren 77.6 artikuluan adierazitako gutxieneko hirigintza-eraikigarritasuna gutxitzeak honako hauetan ere eragin dezake:

   1. Arabako Lurralde Historikoko eta Urdu馻ko udal-mugarteko hiriguneak, udaletxea dagoen hiriguneak kenduta.

   2. Legez etxebizitza babestuaren estandarra bete behar duten udalerrietako hiriguneak, betiere gune nagusian baino biztanle gutxiago bizi badira bertan, bai eta 2.000 biztanle baino gutxiago bizi badira ere. Gune nagusitzat hartuko da udaletxea kokatuta dagoen gunea.

Lurzoruari eta Hirigintzari buruzko Legearen (2/2006 Legea, ekainaren 30ekoa) 78. artikuluan ezarritako estandarra betetzeko, honako baldintza hauek bete beharko dira:

1. Antolatu beharreko sistema orokorren sareko espazio libreen azalera hau izango da:, gutxienez, bost metro karratuko lurzoru biztanleko.

2. Kontuan hartu beharreko biztanleak honako hauen batuketatik aterako dira:

   1. Gaur egungo biztanleria, plangintza orokorra lehenengoz onetsi zen unean zegoena; udal-erroldaren ziurtagiriaren bidez egiaztatuko da.

   2. Biztanleria berria, Plan Orokorrak hiri-lurzoruetan eta lurzoru urbanizagarrietan aurreikusitako bizitegi-garapen berriei lotutakoa, honela kalkulatuta: biztanle bat gehikuntzako bizitegi-sabaiko hogeita bost metro karratuko.

3. Udalerri osoan antolatutako sistema orokorren sareko espazio libreen azaleraren % 50ek, orokorrean hartuta, berdegunearen berezko baldintzak izango ditu, salbu eta hirigintza-plangintzak ehuneko hori doitzea eta beste irizpide batzuetara egokitzea erabakitzen duen kasuetan, klima-aldaketara egokitzeko edo hura arintzeko xedearekin edo behar bezala justifikatutako arrazoiak direla medio.

4. Sistema orokorren sareko espazio libreak biztanleria osoari zuzenduko zaizkio, eta aisialdirako eta jolaserako erabilera publikoetara bideratuko dira. Horrez gain, baimena ematen da beste erabilera publiko batzuk ezartzeko, puntualki eta modu mugatuan, honako hauek barne: haurrentzako jolastokiak, ekipamendu publikoak, baratze kolektiboak eta erabilera eta zerbitzu publikoko beste antzeko erabilera batzuk. Horiek ezartzeko, aurretik justifikatu egin beharko da zergatik komeni den horiek jartzea, bai eta espazio libreek herritar guztiei aisialdiko eta jolaserako erabileretarako lehentasunezko erabilerarekin bat datozela eta bateragarriak direla ere.

5. Sistema orokorren sareko espazio libreek eremu edo espazio independente eta bereiziak osatu ahal izango dituzte, oso-osorik xede horretarako, edo, bestela, gainjarritako hirigintza-zonifikazioaren xede diren multzoen parte izan daitezke.

6. Hirigintza-antolamenduaren bidez beteko da, hirigintza-plangintzaren xedapenetan gauzatze-ondorioetarako zehazten direnak gorabehera; xedapen horien artean daude hirigintza-garapenetan sartzearekin edo horiei atxikitzearekin zerikusia dutenak.

Hogei mila biztanle edo gehiago dituzten udalerrien egiturazko antolamenduan, zehaztu egingo dira gutxienez 1,5 metro karratu lurzoruko eta gehienez 2,5 metro karratuko lurzoruko estandarra betetzen dela bermatzeko behar diren neurriak, aldez aurretik gauzatutakoarekin alderatuta bizitegitarako hirigintza-eraikigarritasunaren gehikuntzako 100 metro karratu sabaiko, edo, zehaztuta ez badago, plangintzan aurreikusitako etxebizitza berri bakoitzeko.

Udalerriko biztanleria 20.000 biztanlekoa edo gehiagokoa den zehazteko, plangintza orokorra hasieran onetsi zenean zegoen biztanleria hartuko da aintzat, dekretu honen 2. artikuluaren l) apartatuko definizioaren arabera.

1. Aipatutako estandarra betetzera bideratutako lurzatien kokapen zehatza hirigintza-antolamendu xehatuan egingo da.

2. Honela bete ahal izango da:

   1. Ahal dela, honako hauetan modu bereizian ezarrita:

      1. Estandarrak ukitutako eremuetako bakoitza.

      2. Estandarrak ukitutako lurzoru mota bakoitza.

   2. Salbuespen gisa, eta aldez aurretik komenigarria dela eta beharrezkoa dela justifikatu ondoren, udalerriko hiri-lurzoru eta lurzoru urbanizagarri guztietan, modu orokortuan.

3. Zuzkidura-bizitokiak kokatu ahal izango dira titulartasun publikoko udalerriko zuzkidurara edo ekipamendu komunitarioetara bideratzen diren lurzoruetan eta eraikinetan edo horien zatietan.

4. Zuzkidura-bizitokiek hirigintza-lurzati independenteak eta bereiziak osatu ahal izango dituzte, osorik edo nagusiki xede horretarako, edo, bestela, gainjarritako hirigintza-zonifikazioaren xede diren multzoen parte izan daitezke.

5. Hirigintza-antolamenduaren bidez beteko da, hirigintza-plangintzaren xedapenetan gauzatze-ondorioetarako zehazten direnak gorabehera; xedapen horien artean daude hirigintza-garapenetan sartzearekin edo horiei atxikitzearekin zerikusia dutenak.

6. Dekretu honetan araututako gainerako hirigintzako estandarrak ez dira zuzkidura-bizitokietan aplikatzeko, horien izaera publikoa eta dekretu honetako 19.b) artikuluan adierazitakoa kontuan hartuta.

1. Hiri-lurzoruko tokiko zuzkidurari dagokion hirigintzako estandarra antolatzeak eta betetzeak honako irizpide hauei jarraituko die:

   1. Lurzoruan, eraikitako azaleran edo modu mistoan beteko da, hirigintza-plangintzak modu arrazoituan eta kasuan-kasuan zehaztutako baldintzetan: zuzkidura berrien hirigintza-antolamenduaren bidez edo lehendik zeuden zuzkidurak hobetzearen, birgaitzearen edo zabaltzearen bidez, aurreikusitako hirigintza-eraikigarritasunaren gehikuntzak eskatutako eskakizunetara egokitzeko.

   2. Zuzkidura horiek honako hauetan kokatuko dira:

      1. Lehentasunez, hirigintza-eraikigarritasunaren gehikuntzagatik zuzkidura berriak izateko beharra sortzen duen lurzati eraikigarrian edo orubean.

      2. Aurreko puntuko lehentasunezko kokapena bete ezin bada, udalerriaren beste alde batean kokatu ahal izango da, eragindako eremutik ahalik eta gertuen, eta jarduketa eten gisa antolatu ahal izango da. Jarduketa hori lurzati eraikigarriak edo orubeak non proposatzen baita hirigintza-eraikigarritasuna handitzea eta zuzkidura berria garatuko den lurzatiak osatuko dute. Kasu horretan, aldez aurretik justifikatu beharko da bideraezina edo desegokia dela lurzati edo orube horretan tokiko zuzkidura jartzea.

         Kasu horretan, zuzkidurak lurzatiari edo orubeari atxikita daudela joko da, plangintzak zehazten duen moduan.

         Zuzkidura horiek zuzkidura-jarduketa bati edo gehiagori atxiki ahal izango zaizkio, xede hauetarako: gauzatzea, Administrazioak lursailak lortzea, zuzkidura-sabaiaren azalera eta urbanizazioa gauzatzea edo haren balioari dagokiona ordaintzea, artikulu honen 7. apartatuan ezarritakoaren arabera.

   3. Zuzkidura berriak antolatuz eta gauzatuz edo lehendik zeudenak hobetzeko, birgaitzeko, berrurbanizatzeko eta handitzeko jarduketen bidez bete ahal izango da. Hori guztia, hirigintza-plangintzak zehazten dituen hiri-bilbea egokitzeko edo hobekuntza puntualak egiteko irizpideekin bat etorriz. Nolanahi ere, antolatutako edo ukitutako espazio libreak publikoak izango dira.

   4. Eraikigarritasunaren bidez edo Administrazioari laga beharreko zuzkidura publikoetarako sabai-azaleraren bidez osorik edo zati batean betetzea aurreikusten den kasuetan, honakoa egingo da:

      1. Egitura besterik ez duen lokal edo eraikin baten berezko akaberekin egikaritzea eta lagatzea, kanpoaldean itxitura perimetral amaitua duela.

      2. Lehendik zeuden zuzkidura-eraikinak hobetzea, birgaitzea edo handitzea, kasu bakoitzean zehazten diren akaberekin, eta horien kostu ekonomikoa ezingo da izan eraikuntza berriko lokalaren edo eraikuntzaren gauzatze-kostua baino handiagoa, aurreko puntuan adierazitakoaren arabera.

   5. Zuzkidura-jarduketari lotutako lurzati eraikigarriko edo orubeko lursailen azalera, hirigintzako estandarrak betetzeko zenbatuko dena, formula honen emaitza izango da:

      ZJAg x GE koef.

      Hau da:

      ZJAg: zuzkidura-jarduketaren lurzatiaren edo orubearen azaleraren guztizkoa, zeinak estandarra bete behar baitu.

      GE koef.: hirigintza-eraikigarritasunaren gehikuntzaren eta aipatutako zuzkidura-jarduketaren lurzatian edo orubean aurreikusitako hirigintza-eraikigarritasunaren guztizkoaren arteko zatiketatik ateratzen den koefizientea.

   6. Tokiko sistemen sareko zuzkiduretara bideratutako lursailek, lokalek, instalazioek eta azpiegiturek honako hauek guztiak egin ahalko dituzte:

      1. Lurzati independenteak osatu, osorik dagokien zuzkidura-helburura bideratutakoak.

      2. Lurzati baten edo batzuen parte izatea, betiere lurzati horien hirigintza-araubidea bateragarria bada aipatutako zuzkidurak bertan ezartzearekin.

      3. Gainjarritako hirigintza-zonifikazioaren xede diren multzoen parte izatea.

   7. Hirigintza-plangintza orokorrak, hala badagokio, zehaztuko ditu egokitzat jotzen diren neurriak, zuzkidura-jarduketen mende dauden hirigintza-garapen aurreikusien testuinguru orokorrean estandarra betetzen dela bermatzeko.

2. Aparkalekuari dagokion hirigintzako estandarra antolatzea eta betetzea honako irizpide hauetara egokituko da:

   1. Ondoriozko aparkaleku-zuzkidura honako hauetara bideratuko da:

      1. % 50 lau gurpileko edo gehiagoko ibilgailu motordunetara.

      2. Beste % 50a, bizikletetara.

         Ehuneko horiek hirigintza-plangintzak birdoitu ahal izango ditu, behar bezala justifikatuta, udalerrian edo udalerriko zenbait aldetan sustatutako edo sustatu beharreko mugikortasun-neurriekin zerikusia duten arrazoiekin.

   2. Gutxieneko neurria eta azalera bigarren xedapen gehigarrian ezartzen direnak izango dira.

   3. Ahal dela, hirigintza-plangintzak antolatutako lurzati pribatuetan ezarriz beteko da, eta, salbuespenez eta komeni edo behar dela justifikatu ondoren, espazio publikoan.

3. Lurzati eraikigarrietako edo orubeetako tokiko zuzkidura berrien hirigintza-estandarrak kalkulatzeko, honela kalkulatuko da hirigintza-eraikigarritasunaren gehikuntza:

   1. Eraikitako orubeak badira, aldez aurretik gauzatutako hirigintza-eraikigarritasunari dagokionez.

   2. Eraiki gabeko orubeak edo lurzati eraikigarriak badira, aurreko hirigintza-antolamenduak esleitutako eta gauzatu gabeko hirigintza-eraikigarritasunari dagokionez, salbu eta ezarritako egikaritze-epeak amaitu badira; kasu horretan, plangintza berriak esleitutako guztizko hirigintza-eraikigarritasuna hartuko da kontuan.

      Lurzati eraikigarriaren kasuan, baldin eta, aurreko hirigintza-plangintzak xehatutako hirigintza-antolamendua izan arren, haren garapenetik kanpo lortu bada urbanizazioa, plangintza berriak esleitutako hirigintza-eraikigarritasunari dagokionez aplikatuko dira hirigintza-estandarrak.

4. Dagoen hirigintza-eraikigarritasuna eta haren gehikuntza kalkulatzeko, baztertu egingo da honako hau: gai honetan indarrean dauden xedapenetan ezarritakoaren arabera, hirigintza-eraikigarritasun gisa zenbatu ezin dena, zuzkidura publikoen hirigintza-estandarrak betetzeko egokiak diren erabileretarako bideratzen delako.

5. Hirigintza-antolamenduari buruzko proposamenak, hala badagokio, gauzatzeari buruzko proposamenekin osatuko dira, eta, horien artean, dagozkien zuzkidura-jarduketetan sartzeari edo horiei atxikitzeari buruzkoak.

   Testuinguru horretan, zuzkidura-jarduketetan sartutako edo horiei atxikitako zuzkidurak gauzatzea jarduketa horiei dagozkien betebeharren parte izango da, hirigintza-plangintzak zehazten dituen baldintzetan eta irismenarekin.

   Horri dagokionez, zuzkidura-jarduketa batean sartutako edo horri atxikitako tokiko zuzkiduretara bideratutako lursailak zuzkiduraren zatitzat hartuko dira hirigintza-kudeaketa eta -gauzatzearen ondorioetarako.

6. Hirigintzako estandarrak zehaztea eta betetzea hirigintza-plangintzak modu orokortuan eta koordinatuan zehazten dituen zuzkidura-helburu eta -aurreikuspenetara egokituko da, bai udalerriko hiri-bilbe osorako, bai udalerriko zati jakin batzuetarako. Dekretu honen ondorioetarako, zuzkidura-helburu eta -aurreikuspen hauek identifikatzen dira: zuzkidura berriak antolatzea; lehendik zeuden zuzkidurak hobetzea eta handitzea; espazio publikoa berroneratzea eta berrurbanizatzea; irisgarritasun-baldintzak hobetzea; antzeko beste helburu batzuk.

7. Zuzkidura-jarduketen zuzkidura-betebeharrak Udalari horien balio ekonomikoa ordainduz bete ahal izango dira, hala jardutea komeni dela justifikatu ondoren. Diru-sarrera horiek hirigintza-plangintzan ezarritako zuzkidura-helburuak eta -aurreikuspenak gauzatzeko inbertitu beharko dira.

1. Hirigintzako estandarrek ukitutako zuzkidura-modalitateak honako hauek dira:

   1. Tokiko zuzkidura hiri-lurzoruan.

   2. Aparkalekua.

   3. Landaredia.

2. Hiri-lurzoruko tokiko zuzkiduraren estandarra aurreikuspen hauen baterako kontsiderazioaren emaitza izango da:

   1. Estandarraren gutxieneko edukia: 2 m2l edo 2 m2s sestra gaineko hirigintza-eraikigarritasunaren gehikuntzako 25 m2s bakoitzeko (2 m2(l)/25 m2(sGehikuntza) edo 2 m2(s)/25 m2(sGehikuntza)). Kalkulua egiteko, dekretu honetako 6.4 artikuluan adierazitakoa aplikatuko da.

   2. Estandarraren gehieneko edukia: dekretu honen 6.1.e) artikuluko xedapenen arabera kalkulatutako lurzati eraikigarriaren edo orubearen azalera konputagarriaren (% 25xAzal.konp.Eremu) % 25en baliokidea.

   3. Nolanahi ere, komenigarria dela justifikatzen bada, hirigintza-plangintzak ehuneko horren ondoriozkoa baino azalera handiagoko zuzkidurak antolatu ahal izango ditu, are hainbat zuzkidura-jarduketei dagozkien zuzkidurak elkartuz ere.

3. Aparkalekuaren hirigintzako estandarra hau izango da: gutxienez, aparkaleku 1 sestra gaineko bizitegitarako hirigintza-eraikigarritasunaren gehikuntzako 100 metro karratu sabaiko (1 aplku./100 m2(sGehikuntza)), dekretu honen 6.4 artikuluan deskribatutakoaren arabera kalkulatuta.

4. Landarediari buruzko hirigintzako estandarra:

   1. Gutxieneko edukia: zuhaitz 1 sestra gaineko hirigintza-eraikigarritasunaren gehikuntzako 100 metro karratu sabaiko (1 unit./100 m2(sGehikuntza)), dekretu honen 6.4 artikuluan adierazitakoaren arabera kalkulatuta, edo, zehaztuta ez badago, plangintzan aurreikusitako etxebizitza berri bakoitzeko.

   2. Horri dagokionez, zuhaitz landatu berriak eta aurretik eskatu beharrekoez gain mantendu direnak zenbatuko dira.

5. Estandar horiek antolatzea eta betetzea dekretu honen 6. artikuluan ezarritako irizpideetara egokituko da.

1. Hirigintzako estandarrek ukitutako zuzkidura-modalitateak honako hauek dira:

   1. Espazio libre publikoak.

   2. Aparkalekua.

   3. Landaredia.

2. Espazio libreen estandarra zuzkidura-jarduketaren xede den lurzati eraikigarriaren edo orubearen azalera konputagarriaren (% 2xAzal.konp.Eremua) ehuneko 2ren baliokidea izango da, dekretu honen 6.1.e) artikuluko xedapenen arabera kalkulatuta.

3. Aparkaleku-estandarraren gutxieneko edukia honakoa izango da:

   1. Aparkaleku 1 hirugarren sektoreko erabilerara bideratutako sestra gaineko hirigintza-eraikigarritasunaren gehikuntzako 100 metro karratu sabaiko (1 aplku./100 m2(sGehikuntza)).

   2. Aparkaleku 1 industria-erabilerara bideratutako sestra gaineko hirigintza-eraikigarritasunaren gehikuntzako 100 metro karratu sabaiko (1 aplku./100 m2(sGehikuntza)). Hala ere, hirigintza-plangintzak estandarra egokitu ahal izango du jarduketaren ezaugarrien arabera.

4. Landarediaren estandarra.

   1. Gutxieneko edukia: zuhaitz 1 sestra gaineko hirigintza-eraikigarritasunaren gehikuntzako 100 metro karratu sabaiko (1 unit./100 m2(sGehikuntza)), edo, zehaztuta ez badago, plangintzan aurreikusitako etxebizitza berri bakoitzeko.

   2. Horri dagokionez, zuhaitz landatu berriak eta aurretik eskatu beharrekoez gain mantendu direnak zenbatuko dira.

5. Estandar horien antolamendua eta betearazpena dekretu honen 6. artikuluan ezarritako irizpideetara egokituko dira, industriako edo hirugarren sektoreko erabilerekin bateragarriak diren neurrian.

   2. ATALA

   HIRI-LURZORUKO JARDUKETA INTEGRATUETAN APLIKATZEKO ZUZKIDURAKO HIRIGINTZAKO ESTANDARRAK

1. Hiri-lurzoruko tokiko zuzkidurari dagokion hirigintzako estandarra antolatzeak eta betetzeak honako irizpide hauei jarraituko die:

   1. Lurzoruan, azalera eraikian edo modu mistoan beteko da, hirigintza-plangintzak modu justifikatuan eta kasu bakoitzean zehazten dituen irizpideen arabera.

   2. Ondoriozko zuzkiduraren % 30, gutxienez, lurzoruan antolatu beharreko tokiko espazio libre publikoetara bideratuko da.

      Aldi berean, gainerako zuzkidura dekretu honen 2.f) artikuluan aipatzen diren eta hirigintza-plangintzan ezartzen diren erabileretara bideratuko da.

   3. Espazio libreen azaleraren % 50ek berdegunearen berezko baldintzak izango ditu, salbu eta hirigintza-plangintzak edo urbanizazio-proiektuak ehuneko hori doitzea eta beste irizpide batzuetara egokitzea erabakitzen duten kasuetan, klima-aldaketara egokitzeko edo hura arintzeko xedearekin edo behar bezala justifikatutako arrazoiak direla medio.

   4. Ekipamendu publikora bideratutako azalera eraikia (berria zein lehendik dagoena) birgaitzeko edo handitzeko eraiki eta laga egin beharko da, egitura besterik ez duen lokal edo eraikin baten berezko akaberekin, eta perimetroko itxitura azaleko akaberarekin, kanpoaldekoa behin-behineko itxitura izanik.

2. Aparkalekuari dagokion hirigintzako estandarra antolatzea eta betetzea honako irizpide hauetara egokituko da:

   1. Ondoriozko aparkaleku-zuzkidura honako hauetara bideratuko da:

      1. % 50 lau gurpileko edo gehiagoko ibilgailu motordunetara.

      2. Beste % 50a, bizikletetara.

         Ehuneko horiek hirigintza-plangintzak birdoitu ahal izango ditu, behar bezala justifikatuta, udalerrian edo udalerriko zenbait aldetan sustatutako edo sustatu beharreko mugikortasun-neurriekin zerikusia duten arrazoiekin.

   2. Ahal dela, hirigintza-plangintzak antolatutako lurzati pribatuetan ezarriz beteko da, eta, salbuespenez eta komeni edo behar dela justifikatu ondoren, espazio publikoan.

   3. Gutxieneko neurria eta azalera bigarren xedapen gehigarrian ezartzen direnak izango dira.

3. Jarduketa integratuari lotutako eremuaren azalera, hirigintzako estandarrak betetzeko kontuan hartuko dena, formula honen emaitza izango da:

   JIAg x GE koef.

   Hau da:

   JIAg: jarduketa integratuan sartutako edo hari atxikitako lursailen azaleraren guztizkoa, bertan sartutako edo hari atxikitako sistema orokorren sareko zuzkiduretara bideratutakoak izan ezik.

   GE koef.: hirigintza-eraikigarritasunaren gehikuntzaren eta aipatutako jarduketa integratuaren eremuan aurreikusitako hirigintza-eraikigarritasunaren guztizkoaren arteko zatiketatik ateratzen den koefizientea.

4. Tokiko sistemen sareko zuzkiduretara bideratutako lursailek, lokalek, instalazioek eta azpiegiturek honako hauek guztiak egin ahalko dituzte:

   1. Azpizona xehatu independenteak osatzea, osorik dagokion helbururako.

   2. Beste tipologia batzuetako azpizona xehatuen parte izatea, betiere horien hirigintza-araubidea bateragarria bada aipatutako zuzkidurak bertan ezartzearekin.

   3. Gainjarritako hirigintza-zonifikazioaren xede diren multzoen parte izatea.

5. Betetzeko, jarduketa integratuaren eremua antolatuko da edo eremura atxikiko da, 12. artikuluan adierazitako zuzkidura-taldekatzea galarazi gabe.

6. Dagoen hirigintza-eraikigarritasuna eta haren gehikuntza kalkulatzeko, baztertu egingo da honako hau: gai honetan indarrean dauden xedapenetan ezarritakoaren arabera, hirigintza-eraikigarritasun gisa zenbatu ezin dena, zuzkidura publikoen hirigintza-estandarrak betetzeko egokiak diren erabileretarako bideratzen delako.

7. Haren hirigintza-antolamenduari buruzko proposamenak haien kudeaketarekin edo gauzatzearekin zerikusia dutenekin osatuko dira, eta, horien artean, jarduketa integratuaren eremuan aurreikusitako hirigintza-garapenetan sartzearekin edo horiei atxikitzearekin zerikusia dutenekin.

   Testuinguru horretan, eremu horretan sartutako edo hari atxikitako zuzkidurak gauzatzea bertan planteatutako hirigintza-garapenei dagozkien betebeharren parte izango da, hirigintza-plangintzak zehazten dituen baldintzetan eta irismenarekin.

   Horri dagokionez, zuzkidura-garapen batean sartutako edo horri atxikitako tokiko zuzkiduretara bideratutako lursailak horren parte direla joko da, haren hirigintza-kudeaketa eta -gauzatzearen ondorioetarako.

1. Hirigintzako estandarrei lotutako zuzkidura-modalitateak honako hauek dira:

   1. Hiri-lurzoruko tokiko zuzkidura.

   2. Aparkaleku publikoa eta pribatua.

   3. Landaredia.

2. Nagusiki bizitegi-erabilerara bideratzen diren jarduketa integratuko eremuetan aplikatu beharreko hirigintzako estandarrak, bai dekretu honetara egokitutako plangintzan, bai aurretik indarrean zegoen plangintzan, honako hauek dira:

   1. Hiri-lurzoruko tokiko zuzkidurari dagokion hirigintzako estandarra: 8 metro karratu lurzoru edo sabai, sestra gaineko hirigintza-eraikigarritasunaren gehikuntzako 25 metro karratu sabaiko (8 m2(l)/25 m2(sGehikuntza) edo 8 m2(s)/25 m2(sGehikuntza)), gauzatutakoarekiko, dekretu honen 9.6 artikuluan xedatutakoaren arabera kalkulatuta. Eduki hori, nolanahi ere, jarduketa integratuaren eremuko lursailen azaleraren % 35 edo gehiago izango da, dekretu honen 9.3 artikuluko xedapenen arabera kalkulatuta.

   2. Nolanahi ere, komenigarria dela justifikatzen bada, hirigintza-plangintzak ehuneko horretatik ateratzen dena baino azalera handiagoko zuzkidurak antolatu ahal izango ditu.

3. Aparkalekuaren hirigintzako estandarrak, gutxienez, aparkaleku 1 izango du bizitegitarako sestra gaineko hirigintza-eraikigarritasunaren gehikuntzako 100 metro karratu sabaiko (1 aplku./100 m2(sGehikuntza), erabilera bererako gauzatutakoarekin alderatuta.

4. Landarediari buruzko hirigintzako estandarra:

   1. Gutxieneko edukia: zuhaitz 1 sestra gaineko hirigintza-eraikigarritasunaren gehikuntzako 100 metro karratu sabaiko (1 unit./100 m2(sGehikuntza)), dekretu honen 9.6 artikuluan adierazitakoaren arabera kalkulatuta, edo, zehaztuta ez badago, plangintzan aurreikusitako etxebizitza berri bakoitzeko.

   2. Horri dagokionez, zuhaitz landatu berriak eta aurretik eskatu beharrekoez gain mantendu direnak zenbatuko dira.

5. Artikulu honen 1. eta 2. paragrafoetan azaltzen dira nagusiki bizitegi-erabilerarako diren eta hirigintza-birkalifikatze baten ondorio diren jarduketa integratuko eremuetan aplikatu beharreko hirigintzako estandarrak. Nolanahi ere, gutxieneko edukia zehazteko, honako hauen guztizkoa zenbatuko da:

   1. Sestra gainean aurreikusitako hirigintza-eraikigarritasuna, honako hauek izan ezik:

      1. Lehendik dagoena eta eraikin babestuei emandakoa, kultura babesteko araubideren baten eraginpean daudelako.

      2. Hirigintza-antolamendu berriarekin bat datozen bizitegi-eraikinetan dagoena.

   2. Jarduketa integratuaren eremuaren azalera, sistema orokorren sarean dagoena eta hirigintza-antolamendu berrian aurreko a) apartatuan aipatutako gainerako eraikinei dagokiena izan ezik.

6. Estandar horiek antolatzea eta betetzea dekretu honen 9. artikuluan ezarritako irizpideetara egokituko da.

1. Hirigintzako estandarren modalitateak. Gutxieneko estandarrak honako hauei dagozkienak dira:

   1. Espazio libre publikoak.

   2. Aparkalekua.

   3. Landaredia.

2. Espazio libre publikoen estandarra jarduketa integratuaren eremuko lursailen azalera konputagarriaren % 6ren baliokidea izango da (% 6xAzalkonp.Eremua), 9.3 artikuluko aurreikuspenen arabera kalkulatuta.

3. Aparkaleku-estandarra, gutxienez, honako hau izango da:

   1. Aparkaleku 1 sestra gaineko hirigintza-eraikigarritasuna gehitzeko sabaiko 100 metro karratuko (1 aplku./100 m2(sGehikuntza)), hirugarren sektoreko erabilerara bideratua, erabilera horretarako gauzatutakoarekiko.

   2. Industria-erabilerarako eraikigarritasunari dagokionez, hirigintza-plangintzak zehazten duen aparkaleku kopurua.

4. Landarediaren estandarra.

   1. Gutxieneko edukia: zuhaitz 1 sestra gaineko hirigintza-eraikigarritasunaren gehikuntzako 100 metro karratu sabaiko (1 unit/100 m2(sGehikuntza)), gauzatutako hirigintza-eraikigarritasunarekiko, salbu eta hirigintzako estandarrak betetzeko zuzkidura-erabilera konputagarrietara edo egokietara bideratutakoa, edo, zehaztuta ez badago, plangintzan aurreikusitako etxebizitza berri bakoitzeko.

   2. Horri dagokionez, zuhaitz landatu berriak eta aurretik eskatu beharrekoez gain mantendu direnak zenbatuko dira.

      9. artikuluko gainerako xedapenak aplikatuko dira, aurrekoekin bateragarriak diren neurrian.

      3. ATALA

      HIRIGINTZAKO ZUZKIDURA-ESTANDARRAK TALDEKATZEA ZUZKIDURA-JARDUKETETAN ETA INTEGRATUETAN HIRI-LURZORUAN

1. Plangintza orokorrak eta plangintza xehatuak zuzkidura-jarduketa nahiz jarduketa integratu biri edo gehiagori dagozkien zuzkidurak batera zein taldeka antolatzea erabaki ahal izango dute, honako edozein helburutarako: hiri-ehunen hirigintza-birkualifikazioa edo -berroneratzea; zuzkiduren konfigurazioa eta tamaina optimoa; zuzkidura publikoen ezarpena, hirigintza-plangintzan ezarritako antolamendu-helburu eta -irizpideen arabera; edo plangintza horrek behar bezala justifikatutako beste helburu batzuk lortzea.

2. Taldekatze hori osatzeko, plangintzan hura kudeatzeko eta gauzatzeko beharrezkoak diren neurriak zehaztuko dira, ukitutako zuzkidura-jarduketak eta jarduketa integratuak identifikatzearekin eta jarduketa horietako bakoitzak gauzatze horretan parte hartzeko irizpideak finkatzearekin lotutakoak barne.

   4. ATALA

   LURZORU URBANIZAGARRI SEKTORIZATUAN APLIKATU BEHARREKO HIRIGINTZAKO ZUZKIDURA-ESTANDARRAK

Estandar horiek Lurzoruari eta Hirigintzari buruzko Legearen (2/2006 Legea, ekainaren 30ekoa) 79. artikuluan ezartzen dira, eta honela daude osatuta:

1. Estandarrak aplikatzeko eta betetzeko eremuak egiturazko hirigintza-antolamenduaren testuinguruan sektorizatutako lurzoru urbanizagarrian mugatutako eta nagusiki bizitegira, industriara edo hirugarren sektorera bideratutako sektore globalek osatzen dituzte.

   Sektore bat hainbat tipologiatako erabilera orokorrez (nagusiki bizitegia, industria edo hirugarren sektorea) osatuta badago, zona bakoitzean aplikatu beharreko estandarrak aipatutako legean erabilera nagusiko modalitate bakoitzerako ezarritakoak izango dira.

2. Espazio libreek lurzoru iragazkorren eta berdeguneen berezko baldintzak izango dituzte. Nolanahi ere, beste irtenbide mota batzuk erabili ahal izango dira, hirigintza-plangintzak edo urbanizazio-obren proiektuek behar bezala justifikatutako arrazoiak kontuan hartuta, betiere horrekin klima-aldaketara egokitzea edo hura arintzea bilatzen bada.

3. Ekipamendu pribatuaren estandarra ekainaren 30eko 2/2006 Legearen 57.2.e) artikuluan aurreikusitako erabileretara bideratuko da. Erabilera zehatzaren araberako banaketa eta kokapena, zuzkidura publikoek izango dutenarekin batera, antolamendu xehatuaren bidez egingo da, kontuan hartuta esparruan zenbatetsitako beharrak, dauden toki-zuzkidurak edo indarreko hirigintza-plangintzan eta plangintza sektorialean aurreikusitakoak.

4. Landarediaren estandarra betetzeko, gutxienez zuhaitz 1 landatu edo kontserbatuko da bizitegi- edo industria-erabilerara nahiz hirugarren sektoreko erabilerara bideratutako sestra gaineko hirigintza-eraikigarritasunaren gehikuntzako etxebizitza berri bakoitzeko edo 100 metro karratu sabaiko (1 unit./100 m2(sGehikuntza)), eta gehikuntza hori aurrez gauzatutako hirigintza-eraikigarritasunarekikoa izango da.

5. Aparkalekuari dagokion hirigintzako estandarra antolatzea eta betetzea honako irizpide hauetara egokituko da:

   1. Zuzkidura publikoetara bideratutako lursailetan antolatu beharreko aparkalekuen zuzkidura honako hauetara bideratuko da:

      1. % 50 lau gurpileko edo gehiagoko ibilgailu motordun konbentzionaletara.

      2. Beste % 50a, bizikletetara.

   2. Titulartasun pribatuko lurzatietan antolatu beharreko aparkalekuen zuzkidura hona bideratuko da:

      1. % 50 lau gurpileko edo gehiagoko ibilgailu motordunetara.

      2. Gainerako % 50a, bizikletetara.

   3. Gutxieneko neurria eta azalera bigarren xedapen gehigarrian ezartzen direnak izango dira.

   4. Aurreko 1. eta 2. azpiapartatuetan ezarritako ibilgailu mota desberdinetarako aparkalekuen ehunekoak hirigintza-plangintzak birdoitu ahal izango ditu, behar bezala justifikatu ondoren, udalerrian edo bertako zenbait tokitan sustatutako edo sustatu beharreko mugikortasun-neurriekin lotutako arrazoiengatik.

6. Lehendik dagoen hirigintza-eraikigarritasuna eta gehikuntzakoa kalkulatzeko, dekretu honen 9.6 artikuluan xedatutakoa aplikatuko da.

7. Tokiko sistemen sareko zuzkiduretara bideratutako lursailek, lokalek, instalazioek eta azpiegiturek honako hauek guztiak egin ahalko dituzte:

   1. Azpizona xehatu independenteak osatzea, osorik dagokion helbururako.

   2. Beste tipologia batzuetako azpizona xehatuen parte izatea, betiere horien hirigintza-araubidea bateragarria bada aipatutako zuzkidurak bertan ezartzearekin.

   3. Gainjarritako hirigintza-zonifikazioaren xede diren multzoen parte izatea.

8. Estandarrak betetzeko, kasuan-kasuan ukitutako eremua edo sektorea antolatuko da.

Bizitegi-zuzkidurako jarduketak Etxebizitzaren 3/2015 Legearen 43. artikuluan jasotako eraikinak birgaitzeko edo hiria berroneratzeko eremuetan egiten direnean, ez dira eskatuko dekretu honen II. eta III. kapituluetan definitutako zuzkidura publiko berriak, hirigintza-eraikigarritasuna handitzeari lotutakoak.

Udalaren hirigintza-plangintzak zehaztuko du babes publikoko araubideren bati atxikita dauden etxebizitzetarako kalifikatutako lursailen erreserba. Erreserba hori, gutxienez, Lurzoruari eta Hirigintzari buruzko Legearen (2/2006 Legea, ekainaren 30ekoa) 80. artikuluan ezarritako estandarrei, zenbatekoei eta espazioa banatzeko irizpideei lotuko zaie, eta honela osatuko dira:

1. Nagusiki bizitegi-erabilera duten jarduketa integratuak, hiri-lurzoru finkatugabean: bizitegi-erabilerako hirigintza-eraikigarritasunaren gehikuntzaren % 40 gordeko da, gutxienez, babes publikoko araubideren bati atxikitako etxebizitzetara bideratutako lursailetan, honako baldintza hauekin:

   1. Babes sozialeko etxebizitzetarako, beharrezko eraikigarritasuna gordeko da, bizitegi-erabilerako hirigintza-eraikigarritasunaren gehikuntzaren % 20ra iritsi arte, gutxienez.

   2. Araubide autonomikoko edo udal-araubideko etxebizitza tasatuetarako gordeko da babes publikoko araubideren batera bideratutako bizitegi-erabilerako hirigintza-eraikigarritasunaren gehikuntzaren % 40ko gutxienekoa osatzeko behar den eraikigarritasuna, aurreko puntua betetzeko gordetakoa kenduta.

2. Bizitegi-erabilera nagusi den erabilera orokorreko lurzoru urbanizagarriko sektoreak: bizitegi-erabilerako hirigintza-eraikigarritasunaren gehikuntzaren % 75 gordeko da, gutxienez, babes publikoko araubideren bati atxikitako etxebizitzetara bideratutako lursailetan, baldintza hauekin:

   1. Babes sozialeko etxebizitzetarako, beharrezko eraikigarritasuna gordeko da, bizitegi-erabilerako hirigintza-eraikigarritasunaren gehikuntzaren % 55era iritsi arte, gutxienez.

   2. Araubide autonomikoko edo udal-araubideko etxebizitza tasatuetarako gordeko da babes publikoko araubideren batera bideratutako bizitegi-erabilerako hirigintza-eraikigarritasunaren gehikuntzaren % 75eko gutxienekoa osatzeko behar den eraikigarritasuna, aurreko puntua betetzeko gordetakoa kenduta.

3. Estandarrak betetzeko erreferentziazko eraikigarritasuna hau da: bizitegi-erabilerako hirigintza-eraikigarritasunaren gehikuntza, aurretik gauzatutakoarekiko.

4. Hirigintza-eraikigarritasuna dekretu honen 9.6 artikuluan xedatutakoaren arabera kalkulatuko da.

5. Plangintza orokorra berrikusteko espedienteen likidazio-txostena:

   1. Plangintza orokorra berrikusteko espedienteetan, berrikusi beharreko plangintzan aurreikusitako bizitegi-garapenen gauzatze-mailari buruzko likidazio-txosten xehatua jasoko da, eta, horien barruan, aipatutako estandarrei dagokien bizitegi-eraikigarritasunari buruzkoa, bai eta berrikuspena egiteko uneko egoerari buruzkoa ere.

   2. Likidazio-txosten hori egiteko, plangintza orokorra berrikusteko egunean hirigintza-antolamendua gauzatzeke duten eremuek, baldin haien antolamendu xehatuko plangintzak 17/1994 Legeko babes publikoko etxebizitzen estandarrak betetzera egokitutako egiturazko antolamendua garatzen badu eta Lurzoruari eta Hirigintzari buruzko ekainaren 30eko 2/2006 Legearen Laugarren Xedapen Iragankorraren laugarren puntuan ezarritako epeen arabera izapidetu bada, estandar horiek betez amaituko dute hirigintza-eraldaketa, eta eremu horiek ez dira kontuan hartu behar plangintza orokorra berrikusteko espedientea betetzeko garaian.

Lurzoruari eta Hirigintzari buruzko Legearen (2/2006 Legea, ekainaren 30ekoa) 80.6 artikuluan xedatutakoa dela medio:

1. Jarduketa integratuetan mugatutako egikaritze-unitateak babes publikoko araubide bati atxikita dauden etxebizitzetarako lurzorua erreserbatzeko betebeharretik salbuetsitzat jo ahalko dira, baldin eta 20 etxebizitzako edo gutxiagoko etxebizitza kopurua edo, kopuru hori zehaztuta ez badago, bi mila metro karratuko bizitegi-erabilerako hirigintza-eraikigarritasunaren gehikuntza aurreikusten bada, dekretu honen 9.6 artikuluan xedatutakoaren arabera kalkulatuta. Salbuespen horrek egikaritze-unitate bakoitzari egiten dio erreferentzia modu autonomoan eta bereizian.

2. Salbuespen horri heldu nahi dioten pertsona edo erakunde publiko nahiz pribatuek udalari idatzizko eskaera bat bidali beharko diote, eta beren titulartasunak egiaztatu beharko dituzte. Jabetzak titular bat baino gehiago dituenean, eskaera egiteko eremuko lurzoru-azaleraren jabetzaren erdia baino gehiago ordezkatzen dutenen arteko akordioa egin beharko da.

1. Lurzoruari eta Hirigintzari buruzko Legearen (2/2006 Legea, ekainaren 30ekoa) 80. artikuluan ezarritakoaren arabera, eta bertan adierazitakoaren arabera hala badagokio, babes publikoko etxebizitzen estandarrak honako modu hauetan bete ahal izango dira:

   1. Transferentzia bidez, aldaketa puntualen edo egiturazko antolamenduaren berrikuspen partzialen espedienteetan.

   2. Osorik betez, egiturazko antolamenduaren berrikuspen integralerako espedienteetan.

   3. Bizitegi-erabilerarako hirigintza-eraikigarritasuna babes publikoko araubide bati atxikitako etxebizitzetarako denean, araubide hori berrikuspenaren xede den plangintza orokorrean planteatutako osorik betetzeko eta transferitzeko proposamenek ukituta dagoenean eta plangintza horren indarraldian gauzatu ez denean, kontuan hartu beharko da berrikuspen-espedienteak bete beharreko legezko estandarrei gehitzeko. Horretarako, 15.e) artikuluan adierazitako likidazio-txostenak horri dagokion egoeraren azterketa jasoko du, berrikuspena egiten den unean.

2. Salbuespen gisa, gauzatzeko dagoen babes publikoko araubideren bati atxikitako etxebizitzak egitera bideratutako bizitegi-erabilerarako hirigintza-eraikigarritasuna ez zaie gehitu beharko berrikuspen-espedienteak bete beharreko legezko estandarrei, baldin haren antolamendu xehatuko plangintza 15.e.2 artikuluan aurreikusitako egoeran badago. Eraikigarritasun hori gauzatzeko, aurreko plangintzan ezarritako estandarrak beteko dira.

3. Behin-behinean onartutako plangintza orokorreko dokumentuak xehetasunez azalduko ditu bizitegi-eraikigarritasun babestua transferitzeko aurreikusitako xedapenak. Xedapen horretan, ukitutako eremuak identifikatuko dira eta artikulu honen aurreko apartatuetan azaldutako gaiak jasoko dira.

4. Etxebizitza-alorreko eskumena duen Eusko Jaurlaritzako organoak baimena eman ahal izango du etxebizitza-eraikigarritasun babestua transferitzeko edo babestutako etxebizitzen estandarrak osorik betetzeko. Behin-behinean onartutako plangintza orokorreko dokumentuari dagokionez Euskal Autonomia Erkidegoko Lurralde Antolamendurako Batzordeak aldeko txostena egin ondoren eman ahal izango da baimen hori. Dokumentu horretan, transferentziaren edo osorik betetzearen alde egingo da. Nolanahi ere, baimen horrek bat etorri beharko du Batzorde horren txostenean adierazitakoarekin. Transferentzia hori baimentzeko, lehenago edo aldi berean babes publikoko etxebizitza kopuru bera egikaritzea bermatu beharko da eskaera egiten den unean.

1. Plangintza orokorraren berrikuspen integraleko edo partzialeko espedienteak indarrean dauden lege-xedapenetan ezarritakora egokituko dira, dekretu honetan araututako hirigintzako estandarrak barne.

2. Bizitegitarako hirigintza-eraikigarritasunaren gehikuntza duten egiturazko antolamenduaren berrikuspenek justifikatu egin dezakete nahikoak direla berrikusten ari diren plangintzan lehendik zeuden zuzkidura-bizitokien eta babes publikoko araubideren baten mendeko etxebizitzen erreserbak. Nolanahi ere, erreserba-aldaketa hori egiteko, Eusko Jaurlaritzan etxebizitzaren arloko eskumena duen organoaren baimena beharko da.

Plangintza orokorraren aldaketa puntualeko espedienteak indarrean dauden lege-xedapenetan ezarritakora egokituko dira, dekretu honetan araututako hirigintzako estandarrak barne, honako irizpide hauen arabera:

1. Lursailak hiri-lurzoru gisa birsailkatzen badira, aldaketa puntuala:

   1. Besteak beste Lurzoruari eta Hirigintzari buruzko Legearen (2/2006 Legea, ekainaren 30ekoa) 83. artikuluan xedatutako irizpideetara egokituko da.

   2. Aldez aurretik antolatutako bizitegitarako hirigintza-eraikigarritasuna aldatu beharreko plangintzan ezarritako araubide juridiko-urbanistikoaren, etxebizitza babestuaren edo sustapen librearen mende egongo da.

2. Lurzoruari eta Hirigintzari buruzko Legearen (2/2006 Legea, ekainaren 30ekoa) 105. artikuluaren 2. eta 5. apartatuetan ezarritakoaren arabera, aldaketa puntuala zuzkidura-bizitokien zuzkidura gehitzearekin osatu behar den kasuetan, plangintza orokorrean aurreikusitako soberakinak kontuan hartu eta zenbatu ahal izango dira, zuzkidura horretarako eskatutako legezko gutxienekoei dagokienez.

   Nolanahi ere, Eusko Jaurlaritzan etxebizitzaren arloko eskumena duen organoaren baimena beharko da, hirigintza-plangintzan sartu behar diren zuzkidura-bizitokien erreserbak nahikoak direla justifikatzeko.

3. Plangintza orokorraren eta hura garatzeko sustatu beharreko plangintza xehatuaren aldaketa dekretu honen xedapenetara egokituko da, eta, hala badagokio, Lurzoruari eta Hirigintzari buruzko Legearen (2/2006 Legea, ekainaren 30ekoa) 105.4 artikulura ere bai, tokiko sistemen sarearen hirigintzako estandarrei dagokienez, hirigintza-eraikigarritasunaren gehikuntzari aplikatzeko direnez.

   Espazio libreen soberazko tokiko zuzkidura duen eremu batean, Lurzoruari eta Hirigintzari buruzko Legean (2/2006 Legea, ekainaren 30ekoa) ezarritako xedapenen ondoriozko tokiko espazio libreen zuzkidura handiagoa bada dekretu honetan hiri-lurzoruko tokiko zuzkidurarako edo tokiko espazio libreetarako ezarritakoen ondoriozkoa baino, dekretu honetan eskatutako tokiko zuzkiduren betebeharrak betetzat joko dira, tokiko espazio libre horien bidez.

   Ez bada hala, antolatu beharreko tokiko espazio libreak dekretu honen estandarra betetzeko beharrezkoak diren gainerako zuzkiduren antolamenduarekin osatuko dira.

4. Urbanistikoki eraldatu ez diren eta lurzoru urbanizagarri gisa sailkatuta dauden lursailek eta, horrez gain, aldaketa puntualaz baliatuta hiri-lurzoru gisa birsailkatu direnek bete egin beharko dituzte lurzoru urbanizagarriei dagozkien estandarrak, gehieneko eta gutxieneko hirigintza-eraikigarritasunei eta tokiko sistemen sarerako zuzkidura publikotarako eta babes publikoko etxebizitzatarako lursail-azaleren erreserbei dagokienez, 2/2006 Legean eta dekretu honetan adierazitako aldaketak eta modulazioak gorabehera.

   LEHENENGO XEDAPEN GEHIGARRIA. Plangintzan aurreikusitako eraikigarritasunak egokitzeko modua.

   1. Ekainaren 30eko 2/2006 Legeak, Lurzoruari eta Hirigintzari buruzkoak, hirigintza-eraikigarritasunaren gehieneko eta gutxieneko mugak automatikoki aplikatzeari dagokionez bigarren xedapen iragankorrean ezartzen duena betetzeko, egiturazko hirigintza-antolamendua egokitzeko dokumentuak honako bide hauetako bat hartzeko aukera izango du, lurralde-antolamenduan eta hirigintzako legedian xedatutakoari jarraikiz:

      1. Hirigintza-eraikigarritasuna gehitzeko edo gutxitzeko agindua ematea.

      2. Antolamendu-eremuaren azalera murriztea edo handitzea.

      3. Eremuaren barneko edo eremuari atxikitako sistema orokorretarako lurzoruen azalera murriztea, horiek lortzeko.

   2. Egokitzapena honako bi modu hauetan egin daiteke:

      1. Automatikoa. Ez da beharrezkoa egiturazko antolamenduaren plangintzarako dokumentu berririk idatzi eta izapidetzea, eta antolamendu xehatuaren dokumentuan justifikatu egin behar da hautatutako konponbidea.

      2. Egokitzapen-dokumentuaren bidez. Egiturazko antolamendurako dokumentu bat, udalerri osoan edo zati batean eragina izango duena, idatziz eta izapidetuz.

         BIGARREN XEDAPEN GEHIGARRIA. Aparkalekuen neurria.

         Jarraian aipatzen diren ibilgailu-modalitateetako aparkalekuen gutxieneko neurria eta azalera honako hauek dira:

      1. Lau gurpileko edo gehiagoko ibilgailu motordunak. Dekretu honetan araututakoak: 88/2022 Dekretua, ekainaren 28koa, Euskal Autonomia Erkidegoan etxebizitzen eta zuzkidura-bizitokien gutxieneko bizigarritasun-baldintzak eta diseinu-arauak arautzen dituena.

      2. Bizikletak: 0,80 m zabal eta 2,10 m luze. Hirigintza-plangintzak neurri horiek doitu ahal izango ditu berriz, egokitzat jotzen diren baldintzetan, justifikatu ostean.

      3. Beste ibilgailu batzuk: hirigintza-plangintzak zehazten duen neurria edo azalera.

         HIRUGARREN XEDAPEN GEHIGARRIA. Tokiko zuzkidurak gehitzeko beharrik eza hirigintza-plangintzaren egiturazko antolamendua berrikusteko prozeduran.

         1. Hirigintza-plangintzak, berrikuspenean, arrazoituta justifikatu ahal izango du ez dagoela tokiko zuzkiduren beharrik hala zehazten dituen zuzkidura-jarduketetan.

         2. Horretarako, justifikatu egin beharko da, hirigintza-plangintzaren berrikuspenean zehazten den hiri-lurzoruaren hedaduran, dekretu honen III. kapituluaren lehen atalean aurreikusitako zuzkidura-beharrak betetzen direla, zuzkidura-jarduketaren eremu bakoitzari dagokion proportzioan.

         3. Hirigintza-antolamenduan aurreikusitako irabazi-asmoko erabileren eta zuzkidura-erabileren arteko aurreko oreka bermatze aldera, plangintzak gehieneko eta gutxieneko muga batzuk ezarri ahal izango ditu, tokiko zuzkidura berririk ez dela behar justifikatzeko balioko dutenak.