Ingurumena

Dekretu honen xedea da enpresa txiki eta ertainei finantzaketa emateko bitartekoa eratzea eta finantzaketa hori eskuratzeko baldintzak eta prozedura arautzea. Bitarteko horren bidez, bankuaren finantzaketa lortu ahal izango da, modalitate ezberdinetan, eta horrela zirkulatzailearen beharrizanak bete, epe laburreko zorra berritu eta epe laburreko zorra epe ertain eta luzerako zor gisa egokitu ahal izango da.

Xede horrekin, Euskal Autonomia Erkidegoko Administrazioak, lankidetza hitzarmenak sinatzen dituzten elkarren bermerako sozietateen eta finantza erakunde laguntzaileen bitartez, Bermearen Funts Berezia eta enpresa txiki eta ertainen aldeko finantzaketa bitartekoa eratuko ditu.

1. Dekretu honetan ezartzen diren finantzaketarako bermeak jaso ahal izango dituzte egoitza Euskal Autonomia Erkidegoan duten enpresa txiki eta ertainek (ETE), baldin eta hurrengo baldintzak betetzen badituzte:

   Ustiapen ekonomikoa burutzea.

   250 langile baino gutxiago edukitzea.

   Urteko negozio-bolumena 50 milioi eurotik gorakoa ez izatea, edo urteko balantze orokorra 43 milioi eurotik gorakoa ez izatea.

   Zuzenean edo zeharka beste enpresa baten edo batera beste enpresa batzuen % 25eko edo hortik gorako partaidetza ez izatea, aurretik adierazitako baldintzaren bat bete gabe.

   Aurretik adierazitakoak beste interpretaziorik balu, Europako Batzordeak enpresa txiki eta ertainak definitzeari buruz 2003ko maiatzaren 6an emandako 2003/361/EE Gomendioan ezarritakoa hartuko da kontuan (Europar Batasunaren Egunkari Ofiziala, L124, 2003ko maiatzaren 20koa), edo gomendio hori ordeztu edo aldatzen duten xedapenak.

   Halaber, elkarren bermerako sozietateen bidez bideratuko diren bermeen onuradun izan daitezke, elkarren bermerako sozietateen araubide juridikoari buruzko martxoaren 11ko 1/1994 Legearen 1. eta 2. artikuluetan ezarritakoarekin bat etorriz sozietate horiek bermatuta kide izan daitezkeen enpresak.

2. Jarduera ekonomikoko sektore guztiek jaso ahal izango dute finantzaketa. Hala ere, ezin dira onuradun izan erakunde eta sozietate publikoak, finantza enpresak (EJZko 81, 82, 831, eta 832 epigrafeak) eta higiezin izaerakoak (EJZko 833, 834 eta 861.1 epigrafeak).

3. Finantzaketa eskuratu ahal izateko enpresa ezin da egon krisi egoeran, Europako Batzordearen 2004/C 244/02 Komunikazioan ezarritakoa betez (Europar Batasunaren Egunkari Ofiziala, 2004ko urriaren 1ekoa); horrez gain, enpresak egunean izan behar ditu foru ogasunekiko betebeharrak.

Finantza egitura egokitzeko proiektuak finantzatzeko modukotzat joko dira baldin eta enpresak aurkeztu duen finantza egitura etorkizunean garatzeko ezegokia bada edo, betiere, horren maniobra funtsa pasibo osoaren % 10etik beherakoa bada edo horren kapital zirkulatzailearen aldaketa negatiboa bada.

1. Bermea behar duten mailegu edo kreditu eragiketen zenbatekoa kalkulatzeko, azaroaren 16ko 1514/2007 Errege Dekretuaren bidez onartu zen Kontabilitateko Plan Orokorraren balantzearen pasibo arrunteko 4 eta 5 multzoetan (Hartzekodun komertzialak eta epe laburreko zorrak) sartzen diren hurrengo partidak zenbatuko dira:

   400. Hornitzaileak.

   401. Hornitzaileak, ordaindu beharreko merkataritzako efektuak.

   407. Hornitzaileentzako aurrerakinak.

   520. Epe laburreko zorrak kreditu erakundeekin.

   521. Epe laburreko zorrak.

   524. Epe laburreko finantza errentamenduaren ziozko hartzekodunak.

   525. Epe laburrera ordaindu beharreko efektuak.

   527. Kreditu erakundeekin dauden zorren epe laburreko korrituak.

   528. Zorren epe laburreko korrituak.

   Merkataritzako efektuen, kreditu kontuen eta merkataritzako hartzekodunen deskontu eragiketetan, eskabidea aurkeztu baino 12 hilabete lehenagoko batez besteko saldoa zenbatuko da.

   Kreditu erakundeekin dauden zorretan, eskabidea aurkeztu osteko bi urte naturaletan amortizaziorako utzi diren kopuruen batura zenbatuko da.

2. Enpresaren pasibo arruntaren egoera aztertu ondoren zehaztuko ditu elkarren bermerako sozietateak, dekretu honetako III. kapituluan ezarri den prozedura betez, abalaren zio den maileguaren edo kredituaren finantza eragiketaren zenbatekoa eta epea.

1. Dekretu honen itzalpean gauzatzen diren mailegu eta kreditu eragiketa guztiak elkarren bermerako sozietate batek bermatuko ditu. Euskal Autonomia Erkidegoko Administrazioak eta bertan jarduten duten elkarren bermerako sozietateek bideratuko dituzte Bermeen Funts Bereziaren eraketa eta funtzionamendua; horrez gain, hitzarmen bat sinatuko dute aipatutako sozietateek bermatzen dituzten finantza eragiketei bermeen sistema bat emateko.

2. Euskal Autonomia Erkidegoko Administrazioak eta finantza erakundeek lankidetza hitzarmenak sinatuko dituzte finantza erakundeei behar dituzten funtsak emateko, hau da, onuradunen aldeko maileguak eta kredituak onartzeko behar dituzten funtsak emateko erakunde horiei, betiere elkarren bermerako sozietateek bermatu dituztenean.

1. Elkarren bermerako sozietateek emandako finantza abalek zuzenean edo zeharka bermatu behar dituzte onuradunek finantza erakunde laguntzaileen aurrean dituzten diru-arriskuak; izan ere, arrisku horiek ondokoen zioz gerta daitezke: bankuko pasiboa berregituratzeko mailegu eragiketak; zirkulatzailea finantzatzeko maileguak; epe laburreko finantza errentamenduen eragiketak; kreditu polizetan eskuragarri dauden kopuruak, baimendutako mugaraino, eta geroago mugaeguneratzen diren merkataritzako efektuak aurkeztearen kontra finantza erakundeek emandako funtsak.

2. Abalen kostua eta baldintzak honako hauek dira:

   Azterketaren ziozko komisioa: maileguaren printzipalaren % 0,15, abala eskatzean eta behin bakarrik.

   Abalaren ziozko komisioa: urtean % 0,50.

   1. Maileguak. Aurretik aplikatuko zaio, urtarrilaren 1eko datarekin, bermatu den maileguaren urteko batez besteko saldoari. Gauzatzen den urtean eta behin betiko mugaeguneratzen den urtean, urtea amaitu arte edo mugaeguneratu arte benetan igaro den egun kopuruarekiko proportzionala den moduan aplikatuko zaio batez besteko saldoari.

   2. Kreditu kontuak: urtekoetan adierazitako batez besteko saldoari aplikatuko zaio.

      Ez da aplikatuko gastu edo komisio osagarririk.

Hona hemen mailegu eta kredituen ezaugarriak:

1. Bermatutako eragiketa bakoitzeko 50.000 euroko zenbatekoa, gutxienez.

2. Onuradun bakoitzaren maileguak guztira ezin dira 600.000 eurotik gorakoak izan.

3. Epea: 1-3 urte. Printzipalak maileguetan duen gehieneko gabealdia urtebetekoa izango da. Amortizazioa eta interesak hiru hilabetean behin egingo dira, dagokion aldia bukatuta.

4. Aplikatu beharreko interes tasa Euriborra izango da, gehi % 0,60, eta hori hiru hilean behin aztertu behar da. Ondorio horietarako, Euribor gisa ulertu behar da, Reuter-en Euribor= pantailaren bidez (oinarria: Act/360) edo, aurrekoa desagertuz gero, informazio bera eman dezakeen beste pantaila baten bidez lortutako bankuen arteko interes tasa. Tasa hori hiru hilabeterako gordailuetarako da, eta eragiketaren dataren edo berrikuspen dataren aurreko azken egun baliodunean kalkulatzen da. Ez da biribiltzerik onartuko.

5. Ez da aplikatuko komisiorik edo gastu gehigarririk.

6. Mailegu-hartzaileak epea bukatu aurretik eta batere kosturik gabe ezeztatu edo kendu ahal izango du mailegua edo kreditua.

Dekretu honek arautzen dituen finantzaketak deialdi batean azalduko dira; deialdia Euskal Herriko Agintaritzaren Aldizkarian argitaratuko da eta horretarako beti beteko dira publizitate, lehia eta objektibotasunaren printzipioak.

Ogasun eta Herri Administrazioko sailburuaren aginduz egingo da aipatutako deialdia. Aginduan, hain zuzen, ondokoak zehaztuko dira: eskuragarri dauden baliabideen guztirako zenbatekoa, eskabideak aurkezteko epea eta tokia eta prozedurari lotutako gainerako alderdiak. Horrez gain, deialdiari heldu dioten elkarren bermerako sozietateen eta finantza erakundeen zerrenda jasoko da aginduan.

1. Eskatzaileek hurrengo agiriak bete beharko dituzte:

   1. Eskabidea, erantsita ematen den F1 inprimakian jasotako ereduaren arabera.

   2. Eskatzailearen ordezko izateko boterearen fotokopia.

   3. Eskabidean jasotzen diren alderdiak egiazkoak direla frogatzeko aitorpen erantzulea (erantsita ematen den F2 inprimakia). Ikuskapen bisita baten bidez frogatuko dira, hain zuzen, hurrengo alderdiak:

      Eskabidea egin den ekitaldiaren aurrekoan, abenduaren 31n, plantillan dagoen langile-kopurual, hilabete horretako TC1aren arabera.

      Eskabidea egin den ekitaldiaren aurrekoan, abenduaren 31n, fakturatutako kopurua.

      Eskabidea egin den ekitaldiaren aurrekoan, abenduaren 31n, urteko balantze orokorraren kopurua.

      Zuzenean edo zeharka, haren kapitalaren % 25 edo gehiagoko partaidetza ez izatea enpresa txiki edo ertain ez den enpresa batek edo batzuek batera.

   4. Foru ogasunetan zerga betebeharrak egunean dituela frogatzen duen ziurtagiria.

   5. Foru Ogasunaren ziurtagiria, Jarduera Ekonomikoen gaineko Zergaren epigrafea, eskatzailea alta emanda dagoena, agertzen duena.

   6. Gizarte Segurantzarekiko betebeharrak egunean dituela frogatzen duen ziurtagiria.

   7. Azken ekitaldietako urteko kontuak.

   8. Pasibo galdagarria finantzatzeko beharrizanen memoria deskribatzailea. Enpresak egin behar du (erantsita ematen den F3 inprimakia).

2. Eskatzaileak gorago aipatutako aitorpenean jasotako daturen bat faltsutzen badu, indarrean dagoen zehapen araubidea ezarriko zaio, bai administratiboa, bai penala.

3. Nolanahi ere, Ogasun eta Herri Administrazio Sailak eta elkarren bermerako sozietate laguntzaileek eskabidea aurkeztu duen enpresari informazio gehiago eskatu ahal izango diote, eskabidea behar bezala ulertu, ebaluatu eta izapidetzeko beharrezkotzat jotzen badute.

1. Enpresa txiki eta ertainek elkarren bermerako sozietateen bulegoetan aurkeztu beharko dituzte eskabideak eta aurreko artikuluan azaldutako gainerako agiriak, hitzarmena betez. Deialdia egiteko aginduan zehazten dira elkarren bermerako sozietate laguntzaileak eta horien bulegoak.

2. Interesdunek informazioa eskuratu nahi badute www.ejgv.euskadi.net atarira sartu edo arreta emateko Zuzenean zerbitzura (012 telefonoa) jo ahal izango dute. Halaber, erakunde horietan eskabideak ere eskura ditzakete, gero aurkeztu ahal izateko.

1. Elkarren bermerako sozietate laguntzaileek aztertu eta ebaluatu beharko dituzte aurkezten diren eskabideak, abala eman baino lehen.

2. Eskabidearen atalen bat bete gabe utzi bada edo horrekin batera ez bada aurkeztu 9. artikuluan zehazten den dokumentazioa, dagokion elkarren bermerako sozietate laguntzaileak 10 egun emango dizkio interesdun enpresari oker hori zuzen dezan edo falta diren agiriak aurkez ditzan; horrela egin ezean, eskabidean atzera egin duela ulertuko da.

3. Elkarren bermerako sozietateak autonomia izango du jasotzen dituen eta xedetzat abala eskatzea duten eskabideak onartu edo ukatzeko; kontraberme errealak edo pertsonalak ere eskatu ahal izango ditu. Horretarako, betiere, egokitzat jotzen dituen aztertzeko eta erabakitzeko irizpideak aplikatuko ditu.

4. Elkarren bermerako sozietate laguntzaileak, eskabidearen azterketa amaitu ostean, eta hala badagokio, «Abala baimentzeko agiria» egingo du. Agiri horretan, F4 inprimakian jasotako informazioa zehaztuko da.

5. Elkarren bermerako sozietateak aldi berean emango die «Abala baimentzeko agiriaren» berri onuradunari, finantza erakunde laguntzaileari eta Ogasun eta Herri Administrazio Sailari.

6. Elkarren bermerako sozietate laguntzaileak Ogasun eta Herri Administrazio Sailari eman behar dio gauzatu diren abal-eragiketen eta ukatutakoen berri. Horretarako, lankidetza hitzarmenean ezartzen diren aldizkakotasuna, betekizunak eta ereduak beteko ditu.

1. Elkarren bermerako sozietateak kreditu eragiketak egiteko «Abala baimentzeko agiria» onetsi duenean, enpresa txiki eta ertainek lankidetza hitzarmena sinatzen duen finantza erakunderen batekin gauzatuko dute abal hori.

2. Finantza erakundeek gauzatzen diren mailegu edo kreditu eragiketen berri eman behar diote Ogasun eta Herri Administrazio Sailari. Horretarako, lankidetza hitzarmenean ezartzen diren aldizkakotasuna, betekizunak eta ereduak beteko dituzte.

1. Eragiketek ezinbestean bete behar dute Europako Batzordearen abenduaren 15eko 1998/2006 Araudian (EE), minimis laguntzei Ituneko 87. eta 88. artikuluetan ezarritakoa aplikatzeari buruzkoan, ezarritakoa.

   Laguntza horiek bateragarriak izango dira beste administrazio publiko, sail, organismo edo erakunde publiko zein pribatu batek emandako laguntzekin; baina salbuespen araudian edo Batzordeak hartutako erabakian kasu bakoitzeko inguruabar zehatzetarako ezarritako laguntza ezin da izan laguntzen metatzea baino handiagoa.

2. Arau honen bidez onuradun diren pertsonek edo erakundeek une oro jakinarazi behar diote Ogasun eta Herri Administrazio Sailari xede bererako beste diru-laguntza edo laguntzarik eta beste minimis laguntzarik jaso duten, bai zergaldi horretan bai ordura arteko aurreko bi zergaldietan.

Programa jarraitu eta ebaluatuko duen batzorde bat eratuko da. Ogasun eta Herri Administrazio Sailaren, elkarren bermerako sozietateen eta finantza erakunde laguntzaileen ordezkariek osatuko dute batzordea, eta bere zeregina programaren aplikazioa eta ebaluazioa aztertzea izango da.