– Mugikortasunaren gaineko akordioa.

1. Akordio hau sinatu eta sei hilabeteko epean Mugikortasunari buruzko hitzarmen berri bat negoziatu eta izenpetzea. Negoziazio horretan honako alde hauek jasoko dira:

   1. 2000ko Mugikortasunaren Akordioa eguneratzea mugikortasun-modalitate desberdinei dagokienez.

   2. Mugikortasun-prozesu berriak martxan jartzea, ospitaleetako barne-mugikortasuna edo derrigorrezko mugikortasuna, esaterako, bi kasuetan Osakidetzako zerbitzu-erakunde guztietan aplikazio-irizpide orokorrak ezarriz.

   3. Arlo honi dagokionez, Osakidetzako Osasunagatiko Lekualdatze Batzorde Korporatibo bat eratuko da, Akordio hau sinatu duten sindikatu bakoitzak izendatutako ordezkariek eta Administrazioak osatua. Batzorde horren eginkizunak izango dira: osasun arrazoiak direla eta, zerbitzu-erakunde bakoitzean konpondu ezin diren lanpostuak egokitzeko eskabideak aztertzea, hala nola, osasunagatiko lekualdatzea finkatzea eskatzen duten kasuak aztertu eta erabakitzea.

   4. Behin betiko mugikortasun-prozedura azkar bat ezartzea zerbitzu-erakundeen artean, urtero bi lekualdatze-lehiaketa deitzea ahalbidetuko duena.

   5. Administrari laguntzaile eta erabiltzailearekiko arretaren lanpostu funtzionalen % 10 erreserbatzea erizaintzako laguntzaileek betetzeko, administrari laguntzaileez gain, dagokion barneko mugikortasun-prozesu baten bidez, aldez aurretik euren gaitasuna egiaztatuz.

2. Zerbitzu-eginkizunetan eta barne-sustapenean mantentzen diren lanbide-sustapeneko prozedurak eguneratzea.

– Lanpostu funtzionalen dekretua garatzea.

Oinarritzat hartuta lanbidearen eginkizunak, kategoria profesional bakoitzean eskatzen diren ezagutza espezializatu teknikoak edo praktikoak, erantzukizun-maila hierarkikoa eta kudeaketaren erantzukizun-maila, Lanpostu Funtzionalen Dekretua garatzeko azterketa-, definizio-, negoziazio- eta akordio-prozesuari ekingo zaio, lanpostu desberdinen funtzioen definizioari eta gaitasunari dagokionez. Prozesu hori honako jarduerekin gauzatuko da:

Lanpostu desberdinen funtzioak aztertuz.

Lanpostu funtzional berriak egokitu eta sortuz.

Behin beharrezkotzat jotako lanpostu funtzional berriak sortutakoan, lanpostu horiei dagozkien ordainketak egokitzeko konpromisoa hartuko da. Benetako onarpena 2009ko uztailaren 1etik aurrera izango da.

Etengabeko jarraipen-sistema bat, teknikoa eta paritarioa, ezarriko da, alderdi horien gainean sor daitezkeen eztabaidak jarraitu eta erabakitzeko.

Aurreko lan horiek garatzeko epea 2009ko martxoaren 31n amaituko da, eta Akordio hau sinatu dutenek berariaz sortutako lan-batzordeak bideratuko ditu lan horiek.

– Aldi baterako kontratazioaren akordioa.

Aldi baterako kontratazioaren akordio berri bat negoziatuko da 2006ko Enplegu Publikoaren Eskaintza amaitutakoan, aldi baterako kontrataziorako zerrendak egiteko irizpideak ezarri eta gaurkotzeko.

Langileen kontratazioaren kalitatea (iraupena) hobetzeko konpromisoa hartu da, 2008ko urria igarotakoan egin beharreko azterketa batean oinarrituta, egindako kontratazioak ikusita. Azterketa hori egin ostean kontratazioaren kalitatea hobetzeko proposamenak egingo dira guztion artean adostuta. Akordioaren Batzorde Paritarioak aurkeztutako neurrien jarraipen- eta berraztertze-sistema bateratu bat ezarriko da.

– Lan-Kontratadun Langileen Eta Funtzionarioen Estatutarizazioa.

2009ko martxoaren 31 baino lehen, lan-kontratadun langileen eta funtzionarioen estatutarizazioaren dekretua negoziatu, tramitatu eta aplikatzea, Euskadiko Antolamendu Sanitarioaren Legean eta Autonomia Erkidegoko langileen administrazio-egoeren Araudian ezarritakoaren arabera. Estatutarizazio-prozesu hori estatutarizazioak eragindako langileen borondatezkotasunean oinarrituta bideratuko da.

– Karrera / Garapen profesionala.

Garapen profesionalaren sistema Osakidetzako talde profesional guztietan araututa azaroaren 22ko 395/2005, otsailaren 27ko 35/2007 eta 248/2007 Dekretuen bidez, honako egokitzapenak hitzartu dira:

1) GARAPEN PROFESIONALEKO SISTEMAN SARTZEA.

• Garapen profesionaleko sisteman sartzeko eremu subjektiboa Osakidetzan zerbitzuak eskaintzen dituen pertsonalari dagokio.

• Beste osasun-zentro batetik edo beste edozein administrazio publiko batetik datorren pertsonala baina Osakidetzan benetan zerbitzu-eginkizunean lan egiten duen pertsonala, mailaren aitorpenera aurkeztu daiteke. Profesional horien ebaluazioa egokitu egingo da, Osakidetzan benetan egindako zerbitzuen arabera.

• Aldi baterako barne-sustapenean dagoen pertsonalak izendapen finkoa dueneko kategorian bakarrik izan dezake garapen profesionala, eta kategoria horri dagokion garapen profesionalaren osagarria jasotzeko eskubidea izango du.

• Administrazioan enplegu finkorik ez duen pertsonalak, deialdiaren ebazpenetan ezarritako baldintza orokorrez gain, beste honako hauek ere bete beharko ditu:

  1. – Garapen profesionala eskatzen duen kategoria berean gutxienez 3 urtez zerbitzuak eskaintzea Osakidetzan. Zerbitzu horiek aukeratutako deialdia baino aurre-aurreko 5 urte lehenagokoak izan behar dira.

  2. – Gainera, deitutako Enplegu Publikoaren Eskaintzaren azken prozesuan parte hartzea, garapen profesionalerako aukeratutako kategoriako azterketa eginez. Salbuespenez, ezinbesteko kasuetan probara aurkeztu ez bada, kontuan hartuko da baldin eta azterketara aurkezteko eskabidea egin badu.

     Pertsonal ez-finkoarentzako ebaluazio-prozedura, batez ere ebaluatzaileei eta ebaluazio-batzordeei dagokienez, dagokion deialdian zehaztu daiteke, eta bere emaitza hurrengo Enplegu Publikoaren Eskaintzetan baloratu ahalko da.

• Zerbitzu berezietan dauden profesionalei eta sindikatu-ordezkaritzan dihardutenei antzinatasunagatik dagokien mailaren gutxieneko puntuazioa emango zaie.

  2) ZER HARTZEN DA EGINDAKO ZERBITZUTZAT GARAPEN PROFESIONALAREN ONDORIOETARAKO.

• Garapen profesionalaren ondorioetarako, honako hau hartzen da egindako zerbitzutzat: garapen profesionaleko maila aitortzeko aukeratu duten kategoria profesionaleko lanpostu funtzionalean eta lanbide-talde bereko edo goragoko lanbide-taldeko kategorietan zerbitzu aktiboan edo asimilatuan benetan egindako zerbitzuen denboraldia, araudiak lanbide sanitarioei buruz ezar dezakeen salbuespenak izan ezik.

  Garapen profesionalaren eredua jarraitzeko batzorde teknikoan erabakiko da aitorpen-aukera egin duen kategoriakoa ez den beste lanbide-taldeetan edo kategorietan egindako zerbitzuen balioa.

• Lanbide-talde berean beste administrazio publikoetan egindako zerbitzuak % 50ean konputatuko zaizkio pertsonal finkoari. Era berean, egiaztatu egin beharko ditu aurkezten den deialdia baino hiru urte lehenago Osakidetzan, zerbitzu aktiboan edo asimilatuan, benetan egindako zerbitzuak, garapen profesionaleko aitorpen-aukera egin nahi duen kategorian.

• Barne-sustapenaren bidez ailegatu den pertsonala, kategoria berrian ez badu gutxieneko denborarik, jatorrizko kategorian aurkez daiteke ebaluaziora.

• Profesional bakoitza ohiko aldiko lehen deialdian aurkezten denean, mailara iristeko egindako zerbitzu hauek konputatuko dira: ezartze-aldian lortutako azken mailarako behar diren zerbitzuez gainekoak. Era berean, eta ebaluaziori dagokionez, aurreko sei edo zazpi urteko merituak hartuko dira kontuan, maila bakoitzari dagokion aldiaren arabera.

  3) GARAPEN PROFESIONALEKO SISTEMAREN ORDAINKETA ONDORIOAK.

  2008ko urtarrilaren 1etik aurrera, 35/2007 eta 248/2007 Dekretuetan jasotako kategoria guztiei portzentaje komunak (I. maila: % 6,70; II. maila: % 13,41; III. maila: % 17,89; IV. maila: % 24,58) aplikatuko zaizkie, I. eranskinean jasotzen diren lanbide-taldeko gehiengoa duen kategoriaren ordainketei dagozkienak.

  Garapen Profesionaleko sistema aplikatzetik ondorioztatuko ordainketak, karrerako osagarriaren baitan sartzen dira. Karrerako osagarri hori osasun-zerbitzuetako pertsonal estatutarioaren Estatu Markoaren abenduaren 16ko 55/2003 Legearen 43.2.e) artikuluan arautzen da. Ordainketa horiek aldian-aldian egokitu eta eguneratuko dira, 2009ko uztailaren 1a baino lehen, urteroko Aurrekontuen Legeek edo beste lege batzuek xedatutakoen arabera, edo Akordio honen baitan ordainketaren xede diren kopuruak egokitzea errazte aldera lortuko diren akordioen arabera, gure inguruko osasun-sistema batzuetan jasotzen direnekin bateragarri izan daitezen.

  Ebaluazioa gainditu duen pertsonal ez-finkoak honako ondorio ekonomikoak izango ditu:

• 2006ko EPEan destinoa lortzen dutenek: lanpostuaz jabetzeko datatik aurrera edo, edozein kasutan, 2008ko ekainaren 1etik aurrera, lanpostuaz jabetzea antolakuntza-arrazoiengatik atzeratzen bada.

• Gainerako pertsonal ez-finkoek: 2008ko EPEa amaitzen den datatik aurrera edo, edozein kasutan, 2009ko uztailaren 1etik aurrera.

  4) ALDI BATERAKO EZARTZE ALDIAREN BEREZITASUNAK.

• Aldi baterako ezartze-aldian, ibilbide profesional osoaren ebaluazioa eta balorazioa egingo da, jarduera-aldiei puntuazio bat emateko, eskura dugun informazioak hala eskatzen duenean. Antzinatasunagatik tokatu ahal zaion mailara iristen ez direnei ebaluazio ostean lortutako puntuazioa osatuko zaie horretara ailegatzeko puntuazio gehigarri bat esleituta, guztiko gehieneko puntuazioa lortuz, zeinak ezin baitu inolaz ere 199 puntu gainditu A eta B titulazio-taldeei dagokionez, eta 110 puntu C, D eta E titulazio-taldeei dagokienez.

• Aldi baterako epe bakoitzean egiteke dauden karrera profesionaleko deialdietan 2008ko urtarrilaren 1ean zerbitzu aktiboan edo asimilatuan dagoen pertsonal finkoa sartuko da.

  5) GARAPEN PROFESIONALAREN EREDUAREN JARRAIPEN BATZORDE TEKNIKOA.

  Garapen profesionaleko ereduari jarraitzeko Batzorde Paritario bat eratu da, Osakidetzaren ordezkariek eta Akordioa sinatu duten sindikatuen ordezkariek osatua. Batzordearen helburua da garapen profesionaleko sistema-inplementazioan ezarritako akordioak bultzatzea, baloratzea, jarraipena egitea eta betetzeaz arduratzea.

  Batzordeak funtzio hauek izango ditu:

  1. Baremo-irizpideak negoziatzea, eta zehazki, aldi baterako epeko deialdietarako ebaluazio-irizpide objektiboen pisua zehaztea eta irizpide horiek berrikustea ohiko epea martxan jartzeko deialdi horien kudeaketa amaitutakoan, irizpide horiek Osakidetzako profesionalen errealitatera egokitzeko. Lan hori, edonola ere, ezingo da egin 2009ko uztailaren 1a baino beranduago.

  2. Gradu-aitorpenaren eta ebaluazio-prozeduren garapenaren gaineko informazioa jasotzea.

  3. Akordio hau aplikatzean sor daitezkeen zalantzak argitzea.

     Batzorde horren osaketa, azterketak eragindako profesionalen taldearen arabera egokitu beharko da, bere kideek une bakoitzean profesionalei eskatzen zaien titulazio bera edo handiagoa izan behar dutelarik.

– Erizaintzaren egoera berezia.

Erizaintzak Osakidetzari etorkizun hurbilean sortuko dion egoera bereziaren aurrean, zeinetan zeregin berri bat izango baituen, Sistema Sanitario Publikoaren hurrengo erronken garapenean giltzarri izango dena, eta kontuan hartuta Enplegatu Publikoaren Oinarrizko Estatutuaren Legeak bultzatutako aldaketak, hitzartu da kuantitatiboki nahiz kualitatiboki pisu handikoa den kolektibo profesional garrantzitsu honentzat aitorpen berezi bat onartzea gure osasun-sistemaren baitan.

Talde desberdinei egiten zaien aitorpen hori zehazteko eta bere rol profesional berriaren aitorpenera egokitzeko, hitzartzen da B1 Taldeko lanpostu funtzionalen oraingo Osagarri Espezifikoa urtean 2.404,36 eurotan gehitzea.

Osagarri espezifiko gehitu hori bi urtetan zehar jasoko da. Horrela, 2008an -urtarrilaren 1etik aurrera- aipatutako zenbateko horren % 75 kobratuko da, eta 2009ko urtarrilaren 1etik aurrera, berriz, % 100.

2008ko urtarrilaren 1etik aurrera, Erizaintzako jarduera ebaluatuko da Lehen Mailako Atentzioan, jarduera horren ezaugarriei dagokienez, zein diren eta aitorpen ekonomikoa zehazteko.

– Familia eta lana bateratzea.

1. Baliabide materialak eskainiko dira (lokalak, altzariak, materiala, ...), langileentzako haurtzaindegiak jartzeko lantokietan.

2. Aldeek familia eta lana bateratzeko proposatu ditzaketen neurri berriak aztertzeko konpromisoa hartu da, Akordioan sartzeko eta akordioa indarrean dagoen bitartean aplikatzeko.

3. Akordioaren 44.2 artikulua (haurduntza lizentziari buruzkoa) emakume guztiei aplikatzea (ez bakarrik pertsonal sanitarioari), guardiak eta gauak erditze aurreko edo ondorengo hiru hilabetetan ez egiteari dagokionez.

– Lanaldia eta erretiroa.

1. Txandetan edo beti gauez lan egiten duen 60 urtetik gorako langileen gaueko faktore zuzentzailea gehitzea. Faktore hori 1,25ekoa izango da. Faktore zuzentzaile hori bera aplikatuko zaio pertsonal horri igande eta jaiegunetan.

2. Azterketa aktuariala egiteko konpromisoa hartu da, Osakidetzak erretiro aurreratuak errazteko, Gizarte Segurantzari dagokionez ezarri daitezkeen arau garatzailearen arabera.

3. Abenduaren 24ko eta 31ko gauetan egindako zerbitzuak gaueko eta jaieguneko kontzeptuagatik ezarritako balioaren bikoitza ordainduko da.

4. Soldatarik gabeko baimena onartu da, urte oso baterainokoa, Osakidetzan 15 urte osoko zerbitzu aldi bakoitzeko. Baimen hori, gehienez bi urtetaraino luza daiteke 30 urteko zerbitzuengatik, langilea 65 urterekin erabat erretiratu aurre-aurreko bi urteetan hartzeko. Bi urte bitarteko epe horretan Gizarte Segurantzari osorik kotizatuko zaio baimena eman aurreko kotizazio-oinarrien arabera.

5. Aurreko puntuan aipatutako baimenaren aukera bat ere aurreikusten da, langilea 65 urterekin erabat erretiratu aurre-aurreko bi urte horietan langileak lanaldia murriztea, Akordioan ezarritako baldintzetan. Lanaldi-murrizketa horrek gutxienez ohiko lanaldiaren heren baten eta gehienez ohiko lanaldiaren erdiaren artekoa izan behar du, epe horretan Gizarte Segurantzari osorik kotizatuko zaiolarik, murrizketa eman aurreko kotizazio-oinarrien arabera.

– Antzinatasuna.

Osagarri pertsonal bat ezarriko da, Auzitegi Gorenaren sententzia aplikatzearen ondorioz lerma ekonomikorik gerta ez dadin. Sententzia horren arabera, dagozkion hirurtekoak hobetzen diren unean betetzen duen kategoriaren arabera ordainduko da antzinatasuna.

– Plantilla handitzea.

Osakidetzaren egungo egiturazko plantilla % 5 handitzeko konpromiso orokorra, horretarako 1.132 lanpostu gutxienez gehitu beharko direlarik, planteamendu hauek kontuan hartuta:

1. Egiturazko plantilla handitzeko konpromisoa talde profesional guztietan, 2007-2009 aldian, gutxienez 787 lanpostu gehituz, horrela banatuta: