10. artikulua.– Araubide Juridikoaren Zuzendaritza.

7. artikuluan esleitutako egitekoez gain, honako hauek dagozkio Araubide Juridikoaren Zuzendaritzari:

1. Lehendakaritzaren eskumen-eremuan, Gobernu Kontseiluari dagozkion gaiak prestatu eta koordinatzea, bai eta Euskal Herriko Agintaritzaren Aldizkarian argitaratu beharrekoak ere.
2. Jaurlaritzaren Lehendakaritzako organoei laguntzea Legebiltzarreko esku-hartzeak egiten, eta, organo eskudunen bitartez, Lehendakaritzak Arartekoarekin, Herri Kontuen Euskal Epaitegiarekin eta beste erakunde publiko batzuekin dituen harremanak koordinatzea eta bideratzea.
3. Lehendakaritzaren aholkularitza juridikoa eta araugintza, indarrean dagoen araudian ezarritako baldintzetan.
4. Saileko organoei aholkuak ematea sektore publikoko kontratuen legeriari buruz, legeria hori hartan araututako edozein prozeduratan behar bezala aplikatzeari buruz eta kontratuak betearazteari buruz, hargatik eragotzi gabe beste organo batzuek beste eskumen batzuk esleituta izatea.
5. Lehendakaritzarako interesgarriak diren legeria, jurisprudentzia eta doktrinaren jarraipena egitea.
6. Berdintasunerako Unitatearen jarduerak zuzentzea eta Lehendakaritzako organoak bultzatzea, koordinatzea eta haiekin lankidetzan aritzea, Emakumeen eta gizonen berdintasunerako eta emakumeen aurkako indarkeria matxistarik gabe bizitzeko Legearen testu bategina onartzen duen martxoaren 16ko 1/2023 Legegintzako Dekretuak sustatutako neurriak betearaztea sustatzeko.
7. Prozedura judizialetan Lehendakaritzaren interesen jarraipena egitea eta haren defentsan lankidetzan aritzea organo eskudunaren bitartez.
8. Euskadiren kanpoko ordezkaritzetako titularrekin lankidetzan aritzea, Zuzendaritzari dagozkion gaietan, behar beste ekintza egiteko, ordezkaritzek behar bezala funtziona dezaten.
9. Sortzen diren ondare-erantzukizuneko espedienteak hastea eta izapidetzea, ondoren Koordinazioaren eta Proiektu Estrategikoen Idazkaritza Nagusiko titularrari helarazteko, hark ebatz ditzan.

7. artikulua.– Zuzendaritzak.

Lehendakaritzaren egitura osatzen duten zuzendaritza guztiei dagokie, dekretu honen hurrengo kapituluetan zehaztutako arlo espezifikoei dagozkien egitekoez gain, honako egiteko orokor hauek betetzea:

1. Kontratazio-organo gisa jardutea esleituta dituzten jardun-arloei dagozkien gaietan, indarreko legeriaren arabera kontratu txikiak direnean.
2. Indarrean dagoen legerian txikitzat tipifikatutako kontratuetarako beharrezkoak diren gastuak baimentzea eta onartzea beren jardun-arloei dagozkien espedienteetan.
3. 15.000 euroko edo hortik beherako gastuak baimentzea eta onartzea, zergak kanpo utzita.
4. Beren eskumeneko arloan, Komunikazio eta Berrikuntza Sozialaren Idazkaritza Nagusiarekin koordinatuta, euskararen erabilera normalizatzeko planean ezarritako helburuak zehaztea eta helburu horiek ezartzeko eta ebaluatzeko behar diren ekimenak garatzea.
5. Lehendakaritzaren Emakumeen eta Gizonen Berdintasunerako Planaren helburuak beren eremuan zehaztea, eta helburu horiek lortzeko ekintzak eta ekimenak sustatu, gauzatu eta ebaluatzea, emakumeen eta gizonen berdintasunaren arloko politiken kudeaketa integratua gauzatuz; hori guztia, Araubide Juridikoaren Zuzendaritzako Berdintasunerako Unitatearen koordinaziopean eta Emakunde-Emakumearen Euskal Erakundearekin lankidetzan.